Bakı, 14 mart, AZƏRTAC
Dağıstanın başçısı Ramazan Abdulatipov Dağıstan Respublikasının Təhlükəsizlik Şurasının iclasını keçirib. AZƏRTAC Dağıstan Prezidentinin rəsmi saytına istinadla xəbər verir ki, iclasda respublikanın icra hakimiyyəti orqanlarının, habelə rayon və şəhərlərinin yerli özünüidarəetmə orqanlarının qonşu region və dövlətlər ilə qarşılıqlı münasibətləri müzakirə edilib.
Ramazan Abdulatipov beynəlxalq əlaqələrin möhkəmlənməsinin Dağıstanın iqtisadi perspektivləri baxımından əhəmiyyətini vurğulayaraq deyib: "Xəzərdə fəaliyyəti genişləndirmək lazımdır. Rusiya XİN-in Mahaçqaladakı nümayəndəliyi bu prosesləri əlaqələndirməlidir. Bizdə olan balıqçılıq müəssisələrini də bərpa etmək lazımdır".
Ramazan Abdulatipov xarici-iqtisadi əlaqələri tənzimləmək üçün Dağıstan Respublikası Xalq Məclisinin və hökumətinin rəhbərliyinin Xəzəryanı dövlətlərə səfərlərini təşkil etməyi tapşırıb.
O, gələn il "Xəzəryanı dövlətlərin regionlararası əməkdaşlığı" mövzusunda Xəzər Forumunun keçirilməsinə hazırlıq işlərinin görülməsini tapşırıb.
Bu məqsədlə Sənaye, Ticarət və İnvestisiyalar Nazirliyinə, habelə Dağıstan hökumətinə Azərbaycan, Qazaxıstan və İran ilə ticari-iqtisadi əlaqələrin tənzimlənməsi işini gücləndirmək göstərişi verilib.
İclas çərçivəsində Dağıstan Respublikasının qonşu dövlətlərdəki nümayəndəliklərinin fəaliyyəti ilə bağlı məsələlər də müzakirə edilib.