Sumqayıt, 14 mart, AZƏRTAC
Pakistan İslam Respublikasının Prezidenti Məmnun Hüseyn martın 14-də Cənubi Qafqazda unikal istehsalat kompleksi - Sumqayıt Texnologiyalar Parkı (STP) ilə tanış olub.
Məlumat verilib ki, 2009-cu ildə fəaliyyətə başlayan STP bu gün Azərbaycanın qeyri-neft sektorunda layiqincə yer tutan müəssisələrdən biridir. Hazırda parkın ümumi sahəsi 250 hektardır. Tərkibində 17 zavodu birləşdirən nəhəng texnoparkın 4500-dən çox işçisi var.
Qeyd olunub ki, qeyri-neft sahəsinin inkişafını strateji vəzifə kimi qarşıya qoyan Azərbaycan Prezidenti İlham Əliyev ölkədə texnoparkların yaradılması təşəbbüsü ilə çıxış edib. Kiçik və orta sahibkarlığın stimullaşdırılmasını nəzərdə tutan regional innovasiya zonasının formalaşdırılması layihəsi çərçivəsində inşa olunan texnoparklar hazırda Azərbaycanda çoxprofilli innovasiyalı mühəndisliyin mərkəzi sayılır.
Sumqayıt Texnologiyalar Parkının tərkibində olan hər bir zavod aparıcı dünya istehsalçılarının ən müasir texnoloji avadanlığı ilə təchiz edilib. Gələcəkdə STP ixrac təyinatlı məhsul istehsalı ilə məşğul olan 30 müəssisəni əhatə edəcək. Yeni zavodlar istifadəyə veriləndən sonra işçilərin sayı artaraq, 10 min nəfərdən çox olacaq.
Sonra Pakistan Prezidenti elektromobildə Parkın müəssisələrini gəzib, kabel, mis və alüminium çubuqların istehsalı, plastik borular, isti sinkləmə, habelə yüksək voltlu elektrik avadanlığı, günəş kollektorları istehsal edən zavodlarda, elektron cihazlar, metal konstruksiyalar, dəqiq emal mərkəzində olub. Bildirilib ki, STP-də buraxılan məhsulun dünya standartlarına uyğunluq sertifikatı var və müəssisələrdə idarəetmə tamamilə avtomatlaşdırılıb.
STP-də görülən işlər və investorlar üçün yaradılan əlverişli şərait Pakistan Prezidenti tərəfindən yüksək qiymətləndirilib.
Sonda ali qonağa xatirə hədiyyəsi təqdim edildi.