Bakı, 14 mart, AZƏRTAC
Azərbaycan Respublikası Dövlət Neft Şirkətinin (SOCAR) “Neftqaztikinti” trestinin Gürcüstan nümayəndəliyi “Telavi-Kurdqelauri su təchizatı sisteminin bərpası” və “Kareli su təchizatı sisteminin bərpası” layihələri üzrə tikinti-quraşdırma işləri uğurla davam etdirir. Trestin qonşu ölkədəki nümayəndəliyi ötən il Gürcüstan Bələdiyyə İnkişaf Fondu tərəfindən adıçəkilən layihələr üzrə elan edilmiş tenderlərin qalibi olub.
Trestdən AZƏRTAC-a verilən məlumata görə, trestin qonşu ölkədəki nümayəndəliyi hazırda qeyd olunan layihələr ilə əlaqədar Gürcüstan Neft Qaz Korporasiyası, Minilliyin Çağırışı Gürcüstan Fondu və Gürcüstan Bələdiyyə İnkişaf Fondu ilə sıx əməkdaşlıq edir.
Qeyd edək ki, trestin Gürcüstan nümayəndəliyi 2006-cı ildən fəaliyyət göstərir. Nümayəndəlik Gürcüstanda neft-qaz boru kəmərlərinin və digər hidrotexniki qurğuların tikintisi, həmçinin infrastruktur layihələrinin icrası ilə məşğul olur.