Yaponiyada dağıdıcı 11 mart sunamisinin 4-cü ildönümü qeyd edildikdən sonra sunami əleyhinə hündür səddin tikintisinə başlanılıb. Yaponiya hökuməti hələ ötən il sahil prefekturalarda 370 kilometr uzunluğunda beton səddin inşasını planlaşdırdığını açıqlamışdı.

ANS PRESS-in məlumatına görə, mütəxəssislər tərəfindən "Böyük yapon səddi" adlandırılan bu tikili Yaponiya hökumətinə 8,7 milyard dollara başa gələcək. Beton sədlər, ilk əvvəl, sunami təhlükəsinin ən yüksək olduğu Fukusima, Miyaqi və İvate prefekturalarında inşa ediləcək.

Yaponiya hökumətinin bu planı yerli sakinlər tərəfindən dəstəklənməyib. Bəzi sakinlər hündür beton sədlərin sunamidən qoruyacağına inanmır, bəziləri isə bu layihənin vergi ödəyiciləri üçün çox ağır olacağını hesab edirlər.

2011-ci il martın 11-də Yaponiyada güclü zəlzələdən sonra gələn sunami nəticəsində 16 minə yaxın adam ölmüş, 3000-ə yaxın adam isə itkin düşmüşdü. Bu hadisə Fukusima prefekturasındakı "Fukusima-1" atom-elektrik stansiyasının zədələnməsi nəticəsində ekoloji böhrana yol açmışdı.
Mənbə
Associated Press