Nəzarət tədbirləri nəticəsində büdcə təşkilatlarında maliyyə qaydala-rının pozulmasına yol vermiş vəzifəli şəxslər barəsində inzibati tənbeh tədbiri qismində cərimələr tətbiq edilib.

Maliyyə Nazirliyindən ANS PRESS-ə verilən məlumata görə, Dövlət Maliyyə Nəzarəti Xidməti tərəfindən 2014-cü ildə aparılmış maliyyə nəzarəti tədbirləri nəticəsində, ümumilikdə 914 nəfər vəzifəli şəxs 516,6 min manat məbləğində cərimə edilib. Həmin cərimə məbləğlərinin dövlət büdcəsinə ödənilməsi təmin edilib.

Maliyyə Nazirliyinin yerli maliyyə orqanlarında aparılmış yoxlamaların nəticələri üzrə maliyyə orqanlarının 3 vəzifəli şəxsi tutduqları vəzifədən azad edilib, 8 vəzifəli şəxsə töhmət, 3 vəzifəli şəxsə xəbərdarlıq elan edilib.

Yuxarıda göstərilənlərlə bərabər, Xidmətin mütəxəssisləri tərəfindən Azərbaycan Respublikası Baş Prokurorluğunun məktublarına və məhkəmə orqanlarının qərarlarına əsasən məktublarda və qərarlarda qeyd olunan suallar yoxlanılıb. Cəmi 6027,2 min manat məbləğində israfçılıq halları aşkar olunaraq yoxlama materialları müvafiq tədbirlər görülməsi üçün aidiyyəti üzrə Azərbaycan Respublikasının Baş Prokurorluğuna göndərilib.
Mənbə
ANS PRESS