Bakı, 12 mart, AZƏRTAC
“Həmrəy” Gənclərin Maarifləndirilməsinə Dəstək İctimai Birliyi Azərbaycan Respublikasının Prezidenti yanında Gənclər Fondunun elan etdiyi VI qrant müsabiqəsinə “Təmiz ekologiya - sağlam həyat” adlı layihə təqdim edib və müsabiqənin qaliblərindən biri olub.
İctimai Birlikdən AZƏRTAC-a bildiriblər ki, martın 11-də Masallıda start verilən və cənub bölgəsində yaşayan gəncləri əhatə edən layihə martın 12-də Lənkəranda, 13-də isə Astarada həyata keçiriləcək.
İctimai Birliyin sədri, layihənin rəhbəri Yəhya Babanlı layihənin başlaması ilə bağlı keçirilən tədbirdə Azərbaycanda həyata keçirilən uğurlu gənclər siyasətindən söhbət açıb. Qeyd edib ki, məqsəd gənclərin ətraf mühitlə qarşılıqlı əlaqəsinə dair bilik və təcrübələrinin artırılmasına, ekoloji maarifləndirilməsinə və onlarda ekoloji mədəniyyətin formalaşdırılmasına töhfə verməkdir.
İctimai Birliyin idarə heyətinin sədri Əfrasim Aşurbəyov təşkilatın məqsədinin gənclərin maarifləndirilməsinə kömək etmək, onlar arasında milli mənəvi dəyərləri, sağlam həyat tərzini təbliğ etmək olduğunu söyləyib. Diqqətə çatdırıb ki, Azərbaycan gəncliyi ümummilli lider Heydər Əliyevin müəyyənləşdirdiyi gənclər siyasətinə sədaqətlə xidmət etməli, bu siyasəti uğurla davam etdirən Prezident İlham Əliyevin ətrafında sıx birləşməlidir.
Yüzdən çox gəncin iştirakı ilə keçirilən tədbirin sonunda layihənin iştirakçılarına sertifikatlar təqdim olunub.