Riqa, 11 mart, AZƏRTAC
Bu gün Latviya Xarici İşlər Nazirliyinin dövlət katibi Andreys Pildrqoviç ölkədə akkreditə edilmiş diplomatik korpusun nümayəndələri ilə görüşüb. Görüşdə Azərbaycanın Latviyadakı səfirliyinin müşaviri Gəray Muradov da iştirak edib.
A.Pildeqoviç Latviyanın Avropa İttifaqı Şurasının sədri kimi gördüyü işlər, keçirilmiş görüşlər haqda məlumat verib, bu sahədə prioritet məsələləri və nəzərdə tutulan proqramı açıqlayıb. Səfirliyin dövlət katibi 16 mart – Latış Legionerlərinin Xatirəsi Günü ilə əlaqədar Latviya hökumətinin mövqeyini bildirərək vurğulayıb ki, həmin gün rəsmən xatirə günü elan edilməyib və hökumət nümayəndələri latış legionerlərinin xatirəsinə həsr edilmiş tədbirlərdə iştirak etmirlər. Latviyada həlak olmuş əsgərlərin xatirəsi rəsmən noyabrın 11-də yad edilir.
Dövlət katibi qeyd edib ki, bununla bərabər, Latviya demokratik dövlət kimi, insanların bütün hüquq və azadlıqlarını, o cümlədən yığıncaqlar azadlığını təmin edir.
A.Pildeqoviç diplomatlarla görüşdə deuyib ki, Latviya bütün totalitar ideologiyaları, insanlığa qarşı, o cümlədən İkinci Dünya müharibəsi dövründə törədilmiş cinayətləri, habelə nasist rejiminin ən dəhşətli cinayətlərindən biri olan Holokostu qətiyyətlə pisləyir.
Dövlət katibi qeyd edib ki, Latviya xalqı İkinci Dünya müharibəsinə zorla cəlb edilib, kütləvi repressiyalara, güllələnmə və sürgünlərə məruz qalıb.
Görüşün sonunda Latviya Xarici İşlər Nazirliyinin dövlət katibi Andreys Pildeqoviç bəşəriyyət tarixində baş vermiş faciəli hadisələrdən düzgün nəticə çıxarmağa çağıraraq, bildirib ki, bu hadisələrin qərəzsiz dərk edilməsi və öyrənilməsi tələb olunur.
Nigar Cəfərli
AZƏRTAC-ın xüsusi müxbiri
Riqa