Bakı, 11 mart, AZƏRTAC
Azərbaycan Respublikası Dövlət Neft Şirkətinin (SOCAR) “Azneft” İstehsalat Birliyində (İB) bu ilin yanvar-fevral aylarında neft-qaz hasilatı və təhvili üzrə müsbət nəticələr əldə olunub.
AZƏRTAC xəbər verir ki, ötən dövrdə İB-də 1 milyon 125 min 544 ton neft hasil olunub, 1 milyon 122 min 348 ton neft isə təhvil verilib. Ötən iki ayda 973084 min kubmetr mavi yanacaq hasil edilib və 933966 min kubmetr qaz satışı həyata keçirilib.
Yanvar-fevral aylarında birliyin 673 quyusunda texniki tədbir görülüb. Nəticədə 6 min 440 tona qarşı, 8 min 339 ton əlavə neft çıxarılıb. Həmçinin, 133 quyuda geoloji tədbir görülüb, nəticədə 9 min 427 ton neft hasil edilib.
Hazırda İB-nin ümumi istismar quyu fondu 3 min 344-ə bərabərdir. Onlardan 3 min 66-sı fəaliyyətdə olan quyu fonduna, 266-sı isə fəaliyyətsiz fonda daxildir. 12 quyu isə mənimsəmədədir.