Bakı, 7 mart, AZƏRTAC
Rusiya Federal Təhlükəsizlik Xidmətinin başçısı Aleksandr Bortnikov Rusiya televiziyasının efirində müxalifət siyasətçisi Boris Nemtsovun qətlində şübhəli bilinərək saxlanılan şəxslərin qafqazlılar olduğunu bildirib.
AZƏRTAC BBC telekanalına istinadla xəbər verir ki, xidmət rəisi qətldə şübhəli bilinən şəxslərin adlarını da açıqlayıb. Anzor Qubaşev və Zaur Dadayev əməliyyat tədbirləri nəticəsində saxlanılıblar.
Təhqiqata yaxın mənbələrdən alınan informasiyaya görə, cinayətkarların qətl zamanı istifadə etdikləri avtomobil də tapılıb.
Qeyd edək ki, Rusiya Baş nazirinin keçmiş müavini, Nijeqorod vilayətinin keçmiş qubernatoru, Yaroslavl vilayət dumasının deputatı Boris Nemtsov fevralın 28-nə keçən gecə Moskvanın mərkəzində, Böyük Moskvoretsk körpüsündə qətlə yetirilmişdi.