Astara, 5 mart, Bağır Əliyev, AZƏRTAC
Martın 5-də Yeni Azərbaycan Partiyası (YAP) Astara rayon təşkilatı Gənclər Birliyinin IV konfransı keçirilib.
AZƏRTAC xəbər verir ki, tədbir iştirakçıları əvvəlcə ulu öndər Heydər Əliyevin abidəsi önünə gül dəstələri düzərək, xatirəsini ehtiramla yad ediblər.
Konfransda çıxış edən YAP Astara rayon təşkilatının sədri Firudin Əhmədov bildirib ki, Yeni Azərbaycan Partiyası yarandığı gündən gənclərin qarşısında qoyulmuş şərəfli və məsuliyyətli vəzifələr uğurla yerinə yetirilir, partiyanın üzvü olan gənclər rayonun ictimai-siyasi həyatında fəal iştirak edirlər.
YAP Astara rayon təşkilatı Gənclər Birliyinin sədr müavini Ruhid Əliyev konfransdan ötən dövr ərzində təşkilatın gördüyü işlər barədə məruzə edib.
YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə çıxışında ölkəmizdə gənclərə göstərilən diqqət və qayğının bu gün ən yüksək səviyyədə olduğunu diqqətə çatdırıb.
Bildirilib ki, Azərbaycanda “Gənclər günü”nün təsis edilməsi, gənclərin fəallığının artırılması, asudə vaxtlarının səmərəli təşkili, əhəmiyyətli layihələrin gerçəkləşdirilməsi istiqamətində həyata keçirilən tədbirlərdə fəal iştirakları onlara göstərilən etimadın bariz nümunəsidir.
YAP Mərkəzi Aparatının məsul işçisi Məcid Əhmədov partiya sıralarında birləşən gənclərin ictimai-siyasi fəallığının artırılması istiqamətində qarşıda duran vəzifələrdən danışıb.
Sonra konfransda təşkilati məsələlərə baxılıb. YAP Astara rayon təşkilatı Gənclər Birliyinin şura və idarə heyətinin üzvləri, sədr və müavinləri, həmçinin YAP Gənclər Birliyinin respublika konfransına nümayəndələr seçilib.