İrəvanda "Çiçəklənən Ermənistan" Partiyasına qarşı prezident Serj Sarkisyan və onun komandası tərəfindən edilən təzyiqlər nəticəsini verib.

Belə ki, partiyanın rəhbəri milyarder Qaqik Sarukyan istefaya göndərilib və onun yerinə yenisi gətirilib.

ANS PRESS-in məlumatına görə, bu barədə Ermənistanın "Qraparak" qəzeti yazıb.

Bildirilir ki, partiyanın ölkənin Milli Məclisdə təmsil olunan "Çiçəklənən Ermənistan" fraksiyasının iclasında Q.Sarukyanın yerinə fraksiya katibi Naira Zoqrabyanın təyinatı ilə bağlı təklif bəyənilib.

Partiyanın Siyasi Şurasının sədr vəzifəsi keçmiş şəhərsalma üzrə nazir işləmiş Vardan Vardanyana etibar edilib. Hansı ki, onun adı Milli Kitabxana binasının təmiri zamanı sui-istifadə fakt üzrə açılan cinayət işində hallanır.

Xatırladaq ki, fevralın ortalarında iqtidarda olan "Respublika" partiyasının iclasında prezident Serj Sarkisyan Qaqik Sarukyan haqqında xoşagəlməz ifadələr işlədib, onu ölkə üçün şər qüvvə adlandırıb və ölkənin Təhlükəsizlik Şurasının üzvlüyündən azad edib.
Mənbə
ANS PRESS