“Azərbaycan daim türkdilli ölkələrlə əməkdaşlığa xüsusi
diqqət ayırıb”.
Bu barədə Publika.az-a açıqlamasında Qırğız
Respublikasında Türkdilli Dövlətlərin Əməkdaşlıq Şurasının (TDƏŞ)
VI Sammitinin keçirilməsini şərh edən politoloq Elçin Mirzəbəyli
deyib.
Onun sözlərinə görə, Azərbaycan Prezidentinin bu sammitdə iştirakı
əhəmiyyətli məqamdır.
E. Mirzəbəyli qeyd edib ki, bu cür görüşlər türkdilli ölkələr
arasında əməkdaşlığı və inteqrasiyanı gücləndirir.
“Sammitdə Türk dünyasının gələcəyi ilə bağlı konseptual baxış
ortaya qoyulub, türkdilli ölkələrin inteqrasiyasına hesablanmış bir
sıra mühüm sənəd imzalanıb. Bütün bu addımlar Türk birliyinin
gücləndirilməsi üçün vacib amillərdir. Bu gün türkdilli dövlətlərin
rəhbərləri arasında inteqrasiya, birlik və əməkdaşlıq üçün ciddi
siyasi iradə mövcuddur”, - deyə o bildirib.
Politoloq Özbəkistanın da uzun zamandan sonra sammitdə iştirakına
diqqət çəkib və bunun TDƏŞ-in perspektivləri baxımından əhəmiyyətli
amil olduğunu vurğulayıb: “TDƏŞ-in VI Sammiti türkdilli dövlətlərin
inteqrasiyası baxımından dönüş nöqtəsi hesab oluna bilər. Çünki
hazırda bu birlik üçün əlverişli bir şəraitin olduğunu düşünürəm.
Regionda baş verən proseslər də türkdilli dövlətlərin
inteqrasiyasını labüd edir. Təbii ki, burada söhbət təkcə
Azərbaycan-Türkiyə birliyindən getmir. Bu platformada assimilyasiya
təhlükəsi qarşısında qalan Mərkəzi Asiya dövlətlərinin iştirakı da
əhəmiyyətli yer tutur. Bu, ayrı-ayrılıqda hər bir dövlətin
təhlükəsizliyi və sabitliyi baxımından mühüm faktordur”.
E.Mirzəbəyli Azərbaycan Prezidenti İlham Əliyevin sammitdə
türkdilli dövlətlərə Dağlıq Qarabağla bağlı çağırışının ciddi mesaj
olduğunu vurğulayıb.
“Münaqişələrin həllində ərazi bütövlüyü amilinin başlıca şərt kimi
Türk Şurasının bəyannaməsində də yer alması, Azərbaycan
torpaqlarının işğaldan qeyd-şərtsiz olaraq azad edilməsinin
vurğulanması təbii ki, arzuolunandır. Bu məsələdə türk
dövlətlərinin vahid mövqeyi təkcə Azərbaycanın ərazi bütövlüyünün
təmin edilməsi baxımından deyil, həm də hüquqi president kimi mühüm
əhəmiyyət daşıya bilər”, - deyə o bildirib.
