Moskva, 22 aprel, AZƏRTAC 
Azərbaycanın Yekaterinburqdakı baş konsulu Sultan Qasımov və Böyük Vətən Müharibəsində Qələbənin 70 illiyi ilə əlaqədar Yekaterinburqda keçiriləcək tədbirlərdə iştirak etmək üçün hazırda bu şəhərdə səfərdə olan Milli Məclisin deputatı, Azərbaycan rus icmasının sədri Mixail Zabelin Rusiya baş prokurorunun müavini Yuri Ponomoryov ilə görüşüblər.
Baş konsul S.Qasımov AZƏRTAC-a bildirib ki, görüşdə Azərbaycan-Rusiya münasibətləri, iki ölkədə diasporların fəaliyyəti və digər məsələlər müzakirə olunub. M.Zabelin Azərbaycanda gedən quruculuq prosesləri, rus icmasının fəaliyyəti, Dağlıq Qarabağ münaqişəsi barədə məlumat verib. Rusiya baş prokurorunun müavini iki ölkənin prokurorluq orqanları arasında əməkdaşlığın inkişafından danışıb, birinci Avropa Oyunlarının yüksək səviyyədə keçirilməsində Azərbaycan tərəfinə uğurlar arzulayıb.
Görüşdə, həmçinin azərbaycanlı gənc futbolçu Emil Hüseynovun Yekaterinburq sakini, erməni Tiqran Çikayan tərəfindən qətlə yetirilməsi və bu cinayət işinin istintaqının ədalətlə aparılmasının vacibliyindən danışılıb. Baş konsul vurğulayıb ki, RF baş prokurorunun müavini Y.Ponomoryov T.Çikanyanın saxlanıldığını deyib və bu cinayət işinin sonadək ədalətlə icra olunacağına əminliyini bildirib.
S.Qasımov, həmçinin qeyd edib ki, baş konsulluq aprelin 24-də uydurma “erməni soyqırımı” ilə əlaqədar Yekaterinburqda keçirilməsi nəzərdə tutulan yürüşlərin məhdudlaşdırılması və ya ləğv edilməsi barədə şəhər rəhbərliyinə müraciət edib.
Eyni zamanda, Yekaterinburq mətbuatının yazdığına görə, yerli hakimiyyət aprelin 24-də erməni kilsəsindən başlanması nəzərdə tutulan yürüşün keçirilməsinə qadağa qoyub.
Fəridə Abdullayeva
AZƏRTAC-ın xüsusi müxbiri
Moskva