Madriddə keçiriləcək növbəti toplantıda Azərbaycanda prezident seçkiləri ilə bağlı məruzə təqdim ediləcək

Bu gün Parisdə Avropa Şurası Parlament Assambleyasının Siyasi İşlər və Monitorinq komitələrinin iclasları keçirilir. Lent.az-ın məlumatına görə, Azərbaycanın bu qurumdakı daimi nümayəndə heyətinin rəhbəri Səməd Seyidovun da iştirak etdiyi toplantıda Avropa Qonşuluq Siyasətinə, Gürcüstanda, Kosovoda, Ukraynada, Yaxın Şərqdə vəziyyətə dair məsələlər müzakirə olunacaq.
Monitorinq Komitəsinin iclasında Azərbaycanda keçirilən prezident seçkilərinin nəticələri də müzakirə ediləcək. Qurumun Azərbaycan üzrə həmməruzəçiləri Andres Herkel və Yevgeniya Jivkova seçkilərlə bağlı mövqelərini bildirəcəklər.
Bu toplantılardan sonra Madriddə qurumun daimi komitəsinin iclası keçiriləcək və burada Azərbaycanda prezident seçkiləri ilə bağlı məruzə təqdim ediləcək.