Azərbaycanlı deputat Qənirə Paşayeva AŞPA-da Ermənistan heyətinə sərt cavab verib. ANS PRESS-in məlumatına görə, o, ermənilərin Xocalı soyqırımını törədən bir ölkənin təmsilçiləri olaraq burada çıxış etmək haqqı olmadığını deyib.

"Təssüf edirəm ki, Ermənistan nümayəndə heyətinin üzvləri bütün çıxışlarını Türkiyə və Azərbaycana həsr edərək yanlış, qərəz dolu məlumat və fikirlər səsləndirdilər. Qonşusunun, Azərbaycanın 20 faiz torpaqlarını işğal edən və bu gün də işğal altında saxlayan bir ölkənin Ermənistanın təmsilçilərinin bu Assamleyada hər hansı bir ölkəni tənqid etmək haqqı yoxdur. 1 milyon azərbaycanlını öz evindən qaçqın və məcburi köçkün salan və bu gün də onların öz evlərinə dönməsinə imkan verməyən bir ölkənin millət vəkillərinin Avropa Şurası Assambleyasında insan haqlarından danışmaq haqqı yoxdur. İşğalçı bir ölkənin, 1 milyon insanın bütün insan haqlarını 20 ildən artıqdır ki, tapdalamaqda davam edən bir ölkənin, Ermənistanın insan haqlarından dəm vurub kimlərəsə dərs keçmək haqqı yoxdur və çox gülünc görünür. Yaxşı olardı ki, o, yalan, qərəz dolu məlumatlarla bütün çıxışlarını Türkiyə və Azərbaycana həsr etməkdənsə öz ölkələrində vəziyyətindən danışaydılar. Onların Türkiyə və Azərbaycan haqqında səsləndirdiyi fikirlər qərəzdən və yalandan başqa bir şey deyil və çox təssüf edirik ki, onlar bu kimi addımlara son qoymurlar".

Deputat AŞPA-nı işğalçı Ermənistana təzyiq göstərməyə çağırıb. Q.Paşayeva bir daha xatırladıb ki, Ermənistan AŞ qarşısında Dağlıq Qarabağ münaqişəsi ilə bağlı öhdəlik götürüb. Amma heç bir addım atmayıb.

"Öz evinə dönə bilıməyən və insan haqları işğalçı Ermənistan tərəfindən tapdanmaqda davam edən azərbaycanlı qaçqın və məcburu köçkünlər sizdən bunu gözləyir və sizi buna çağırırlar.

Ermənistan heyəti siz nədən yüz il əvvəl olan hadisələri heç bir rəsmi subutlar olmadan soyqırım kimi təqdim edirsiniz amma öz ölkənizin törətdiyi soyqırıma görə ailələrini itirmiş Xocalılardan bir dəfə də olsun üzr istəməyibsiniz?

Ölkəniz Ermənistan nədən bu dəhşətli soyqırımı törədənləri Ermənistanda gizlədir və onların ədalət qarşısında cavab verməsinə imkan vermirsiniz?

Nə üçün əhalisinin əksəriyyətini məhv etdiyiniz Xocalıdan qaçaraq canını qurtara bilmiş çox az sayda Xocalı sakininin 23 ildir öz evlərinə dönməsinə imkan vermirsiniz?

Ermənistan heyətindən bu suallara cavab vermələrini gözləyirik".

Millət vəkilindən sonra çıxış edən Ermənistan nümayəndə heyəti təmsilçisi suallara heç bir arqumentlə cavab verə bilməyib.
Mənbə
ANS PRESS