Gələn ilin iyununda Azərbaycan və Türkiyə tarixinə həsr olunmuş böyük konfrans təşkil olunacaq

Bu gün Xarici Ölkələrdə Yaşayan Azərbaycanlılarla İş üzrə Dövlət Komitəsinin (XÖYAİDK) sədri Nazim İbrahimov Azərbaycan Türkiyə Tarix Araşdırmaları Fondunun (ATAF) Himayəçilər Şurasının üzvləri ilə görüşüb.

Komitənin mətbuat xidmətindən Lent.az-a verilən məlumata görə, görüşdə ATAF Himayəçilər Şurası sədrinin müavini, Azərbaycan Türkiyə İş Adamları Birliyinin sədri Əhməd Erentok bildirib ki, gələn ilin iyun ayında Azərbaycan və Türkiyə tarixinə həsr olunmuş böyük bir konfrans təşkil olunması qərara alınıb. Ə. Erentok azərbaycanlıların və türklərin tarix boyu mövcud olan erməni problemi ilə bağlı kiçik ölçülü yaddaş kitabçasının hazırlanıb xarici ölkələrdə yaşayan soydaşlarımız arasında yayılması barədə təşəbbüs qaldırıldığını da bildirib. Bu kitabça ermənilərin türk millətinə qarşı törətdiyi qətliamlar, soyqırımı barədə qısa və konkret xronoloji bilgi xarakteri daşımalıdır.

Təşəbbüsə dəstək verən Dövlət Komitəsinin sədri Nazim İbrahimov deyib ki, dünyanın müxtəlif ölkələrinə səpələnmiş azərbaycanlıların və türklərin yaşadıqları ölkənin ictimai-siyasi həyatında daha inamlı yer tutmaları, getdikcə daha keçərli söz sahibinə çevrilmələri, Azərbaycan və Türkiyənin qarşılaşdığı problemlərin daha yüksək kürsülərdən səsləndirilməsi üçün hər şeydən əvvəl öz milli köklərini, qədim tarixini bilmələri zəruri şərtdir.


Nazim İbrahimov qeyd edib ki, hazırda azərbaycanlı alimlər Dünya Azərbaycanlılarının Xartiyası üzərində işləyirlər.

ATAF Himayəçilər Şurası İdarə Heyətinin sədri, Türk Tarix Qurumunun sabiq rəhbəri Yusif Halacoğlu da gələn il keçirilməsi qərara alınan Azərbaycan və Türkiyə tarixinə dair konfransda müzakirəsi nəzərdə tutulan məsələlər barədə danışıb və Dövlət Komitəsinin bu tədbirə dəstək verməsini zəruri sayıb. Nazim İbrahimov XÖYAİDK-nin səlahiyyətləri çərçivəsində bu konfransa dəstək verəcəyini bildirib.

Pərvin ABBASOV