Bakı, 8 aprel, AZƏRTAC
Azərbaycan Milli Elmlər Akademiyasının İdarəetmə Sistemləri İnstitutunun laboratoriya rəhbəri Robert Qarayevin müasir informasiya (rəqəmsal) iqtisadiyyatının əsas probleminə həsr olunan məqaləsi World Scientists Indexinə (WSI) daxil edilib.
İnstitutdan AZƏRTAC-a bildiriblər ki, informasiya (rəqəmsal) iqtisadiyyatına keçidin əsası informasiya-kommunikasiya texnologiyalarının (İKT) iqtisadiyyatın müxtəlif subyektlərinin iqtisadi inkişafına və ilk növbədə, regionların iqtisadi inkişafına təsirinin qiymətləndirilməsi problemidir.
Problem olduqca çox mürəkkəbdir, bu günədək çoxlu müzakirələrin predmetini təşkil edir və 25 ildən çox iqtisadi təcrübədə “R.Sollou paradoksu” kimi məlumdur.
Problem çoxfaktorlu, qeyri-müəyyən və dinamik xarakterlidir və ekonometrikanın ənənəvi üsullarının köməyi ilə həll olunmur.
R.Qarayevin “Choice of a Strategy of Regional ICT-management. Cognitive Paradigm” (International Journal of Managing Information Technology. Vol.5, No.3, August 2013) məqaləsində problemin həlli üçün yeni yanaşma təklif olunur.
Yanaşma İKT-nin iqtisadi təsirinin qiymətləndirilməsi, həmçinin bu təsirin idarə olunması, ümumiyyətlə, İKT-menecmentin effektiv bərqərar edilməsinə geniş imkanlar açan koqnitiv modelləşdirmənin ideya və üsullarına əsaslanıb.
Qeyd edək ki, R.Qarayev 13 ildən çoxdur ki, koqnitiv texnologiyalar ilə məşğul olur. Bu sahədəki işlərinə görə o, 2003-cü ildə Rusiya Elmlər Akademiyasının diplomuna və akademik N.Fedorenkonun İqtisadi Tədqiqatlar Beynəlxalq Elm Fondunun qrantına layiq görülüb.
R.Qarayevin “Menecment kolsaltinqin koqnitiv alətləri” məqaləsi Rusiya saytlarında yerləşdirilib və 51 min 97 nəfər istifadəçi tərəfindən yüklənib. Hazırda məqalə Rusiya, Ukrayna, Belarus və Qazaxıstanın ali məktəblərinin kitabxana saytlarında yerləşdirilib.