Bakı, 18 mart, Günel Əfəndiyeva, AZƏRTAC
“Flamenko” məşhur və əlamətdar musiqilərdəndir. Nüfuzlu mükafata sahib olan, flamenko bəşəri musiqi kimi bir çox ölkələrdə tanınıb. Bu musiqini qəlbən hiss etməsən, düşünməsən onu sonadək anlaya bilməzsən.
Bu sözləri İspaniyadan gəlmiş Qranadalı flamenko vokalçısı Xuan Piniya Martin AZƏRTAC-a müsahibəsində deyib. “Qranada Flamenkosunun Siması” mükafatı ilə təltif olunan müğənni “Muğam aləmi” IV Beynəlxalq Muğam Festivalı çərçivəsində Beynəlxalq Muğam Mərkəzində keçirilən konsertdə çıxış edib.
Bakıda keçirilən belə gözəl festivalında ilk dəfə iştirak etdiyini vurğulayan ifaçı Azərbaycanı daha yaxından tanımaq üçün paytaxtımıza yenidən gələcəyini söyləyib.
O deyib: “Azərbaycanda olmaqdan qürur duyuram. Olduqca qonaqpərvər, sülhsevər, böyük bir musiqi duyumu olan Azərbaycan xalqının qədim muğam sənətini bu cur böyük şövqlə təbliğ etməsi insanı sevindirir. İspaniyaya qayıtdıqdan sonra Bakı ilə bağlı təəssüratlarımı öz həmkarlarımla bölüşəcəyəm”.