IDEA İctimai Birliyi Beynəlxalq “Yer saatı” kampaniyasının (www.earthhour.org) Azərbaycan üzrə rəsmi ölkə koordinatoru qismində “Yer saatı 2015” ilə əlaqədar sosial şəbəkə istifadəçilərini yeni videomüsabiqədə iştirak etməyə dəvət edir.
İctimai Birlikdən Trend-ə verilən məlumata görə, müsabiqə iştirakçılarından ətraf mühit çağırışlarını ifadə edən və qaranlıq şəraitdə çəkilmiş videoçarxların “baş qəhrəmanlarını” müəyyən etmək tələb olunur.
Belə ki, 27 mart tarixinə qədər hər həftə 4 məşhur şəxsin iştirak etdiyi videoçarxlar IDEA İctimai Birliyinin və “Yer saatı” (“Earth Hour”) kampaniyasının Azərbaycan üzrə rəsmi feysbuk (www.facebook.com/ideacampaign.org və www.facebook.com/earthhouraze) və instaqram (idea_public_union və earthhourazerbaijan) səhifələri vasitəsilə ictimaiyyətə təqdim olunacaqdır. Qeyd edək ki, sözügedən videoçarxların mövzusu bu il qeyd olunacaq “Yer saatı” kampaniyasının beynəlxalq şüarına – “İqlim dəyişikliyini dayandır!” (“Stop climate change”) uyğun olaraq hazırlanmışdır.
Sosial şəbəkə istifadəçiləri videodakı çağırışları səsləndirən şəxslərin adlarını həmin videoçarxın paylaşıldığı linkin şərh hissəsində yazmaqla, müsabiqəyə qoşula bilər. Düzgün cavabı birinci yazmış iştirakçılara müvafiq xallar (bir düz cavab – bir xal) veriləcəkdir. Hər həftənin sonu müsabiqənin gedişi və iştirakçıları reytinqi barədə IDEA İctimai Birliyinin və “Yer saatı” kampaniyasının sosial şəbəkələrdəki səhifələrində məlumatlar dərc olunacaqdır.
Müsabiqənin sonunda videolar tam formatda təqdim olunmaqla iştirak edən məşhurların adları açıqlanacaq. Ən çox düzgün cavab tapmış sosial şəbəkə istifadəçisi 28 mart tarixində qalib elan ediləcək və IDEA İctimai Birliyi tərəfindən mükafatlandırılacaqdır.
Müsabiqə çərçivəsində təqdim olunacaq videoçarxları 12 mart tarixindən etibarən IDEA İctimai Birliyinin və “Yer saatı”nın sosial şəbəkələrdəki səhifələrində izləyə bilərsiniz!
Milli.Az
