Bakı, 7 mart, AZƏRTAC
Belarusun paytaxtı Minskdə Aleksandr Medvedin mükafatı uğrunda sərbəst və qadın güləşi üzrə böyüklər arasında 45-ci beynəlxalq Qran-pri turniri davam edir.
AZƏRTAC xəbər verir ki, turnirdə sərbəst güləş üzrə Azərbaycan yığma komandasının üzvləri iştirak edirlər.
Turnirin ilk günündə 57, 65, 74 və 97 kiloqram çəki dərəcəsində sərbəst güləşçilər mübarizə aparıblar.
Yarışda 97 kiloqram çəki dərəcəsində finalda yığma komandamızın iki üzvü qarşılaşıb. Olimpiya Oyunlarının ikiqat bürünc medalçısı Xetaq Qazyumov ardıcıl olaraq Ukrayna təmsilçisi Hleb Kutey, Slovakiya idmançısı Jozef Jaloviar, Moldovadan Nikolay Çeban, yarımfinalda isə gürcüstanlı Omar Qusoşvilini məğlub edib. Bütün rəqiblərinə xal vermədən qalib gələn X.Qazyumov finalda yığma komandamızın digər üzvü Şərif Şərifovla qarşılaşıb. Olimpiya çempionu Şərif Şərifov finaladək qazaxıstanlı Mamed İbrahimov, ABŞ təmsilçisi David Zabriske, Ukrayna güləşçiləri Avropa çempionu Pavlo Oleynik və London Olimpiadasının gümüş medalçısı Valeriy Andreytsevi mübarizədən kənarlaşdırıb.
Gərgin keçən və maraqla izlənilən final qarşılaşması Xetaq Qazyumovun 5:0 üstünlüyü ilə tamamlanıb. Bu nəticə ilə Xetaq Qazyumov qızıl, Şərif Şərifov isə gümüş medal qazanıb.