Kəpəz TV (Region TV) xəbər verir ki, hazırda Tovuzda yaşayan 70 yaşlı Südabə Qasımova 15 ilə yaxındır ki, ağacları calaq etməklə məşğuldur. Oğlunun dostundan öyrəndiyi bu peşəni illərdir davam etdirdiyini deyir. Südabə xanımın sözlərinə görə, yaz calağı digərlərinə nisbətən daha tez tutur. Ancaq digər sahələrdə olduğu kimi calaq işinin də çətinlikləri var. Tovuz sakini çalaq işində ən çox zəhmət tələb edənin xar tut bitkisi olduğunu bildirir.
Yaşının bu çağında vurduğu calaqların, demək olar ki, hamısı tutur. Onun bu bacarığına həsəd aparanlar da az deyil. Südabə Qasımova deyir ki, caladığı ağacları, əsasən, qohum əqrəbasına pay verir.
Südabə Qasımovanın bu işdə bir özəlliyi də var ki, o, digər calaqçılardan fərqli olaraq ağacın calaq hissəsinə şüşə qab keçirərək onu soyuqdan və digər təhlükələrdən qoruyur.
Milli.Az
