Bu gün təcavüzkar siyasət yeridən Ermənistan 100 il əvvəl guya məruz qaldığı qondarma soyqırımın 100 illiyinə bütün dünya dövlətlərini dəvət etsə də, indidən demək olar ki, nəticə vermədi. Əslində Rusiya və Fransa prezidentlərinin İrəvana gələcəyi barədə açıqlamalar Ermənistanın dırnaqarası dərdinə şərik olanların sayının çox olacağı görüntüsünü yaradırdı. Tədbirə iki gün qalmış isə məlum olub ki, İrəvanın yolunu gözlədiyi dövlət başçıları müxtəlif bəhanələrlə aradan çıxıblar. Rusiya və Fransadan başqa cəmi iki dövlətin Serbiya və Cənubi Kiprin ölkə başçısı səviyyəsində İrəvana gəlməsinin öz səbəbləri var.

Ermənistanın 24 apreldə keçirəcəyi qondarma soyqırım tədbirlərində cəmi 4 ölkənin prezidenti iştirakı edəcək. Rusiya prezidenti Vladimir Putin İrəvana gəlir, lakin Moskvada ermənilərin aksiya keçirməsinə icazə verilmədi. Soçidə isə qondarma soyqırım bannerləri sökülüb.

Fransa prezidenti Fransua Ollandın həmin tarixdə İrəvanda olacağı dəqiqləşib. Serbiya prezidenti Tomislav Nikoliç və Cənubi Kiprin rəhbəri Nikol Anastasiadisın da İrəvana səfəri gözlənilir. Sonuncunu böyük nümayəndə heyəti müşayiət edəcək.

Almaniya prezidenti Berlində ermənilərin təşkil edəcəyi anım tədbirinə qatılacağından İrəvana gələ bilmir. Bu arada Almaniya Federal Parlamenti Avropa Parlamentinin aprelin 15-də qəbul etdiyi qərarı müzakirəyə çıxaracaq. Avstraliya, Böyük Britaniya kimi böyük dövlətlər bu mərasimi rədd ediblər.

Erməni mətbuatı yazır ki, Çexiya prezidenti Miloş Zemanın Vatikanda görüşü olmasaydı, İrəvana mütləq gələrdi. Ümumiyyətlə, bu cür təsəlliverici fikirlər tez-tez səsləndirilir. Rəsmi şəxslərin dilindən giley-güzar da edilir.

Məsələn, Ermənistan parlamentinin vitse-spikeri Eduard Şarmazanov deyib ki, əgər Ermənistan Avrasiya İttifaqının üzvüdürsə, 24 apreldə Rusiya kimi, Belarus və Qazaxıstan prezidentləri də İrəvanda olmalıdırlar.

Bu arada Qazaxıstan prezidenti Nursultan Nazarbayev Ermənistana getməmək barədə qərar verərək erməniləri məyus edib.

Əlbəttə Türkiyə prezidentinin Qazaxıstana səfərindən sonra, bu ağlabatan görünmürdü.

Politoloqlar hesab edir ki, Ermənistanın uzun müddət dəridən qabıqdan çıxmasının bir mənası olmadı. Bu siyasət müəyyən mənada iflasa uğradı. Rusiya və Fransa prezidentlərinin İrəvana gəlməsi gözlənilən idi. Çünki, hər iki ölkə Ermənistana yaxın münasibətilə seçilir. Hər iki həmsədr dövlət Azərbaycanla münasibətləri də möhkəmləndirməkdə maraqlıdır.

Son vaxtlar Rusiya ilə Azərbaycanın əlaqələrində yaxınlaşma müşahidə olunur. Eyni zamanda Fransua Ollandın İrəvandan dərhal sonra Azərbaycana səfəri təsadüfi deyil.

Politoloq Fikrət Sadıqovun sözlərinə görə, İrəvanın ümidləri müəyyən mənada puça çıxıb: “Bir çox dövlətlərin başçılarını dəvət edən İrəvan problemlə üzləşir, dəvət etdiyi prezidentlərin cəmi 4-ü gəlir. Çünki, biz yaddan çıxarmamalıyıq ki, bu konteksdə rəsmi Ankara da öz sözünü deyir”.

Türkiyə 24 apreldə Çanaqqala zəfərinin 100 illiyini qeyd edəcək. Bu tədbirlərə də bir neçə ölkənin prezidenti və rəsmiləri qatılacaq.

Mənbə
ANS TV: İlkin Kərimov