Budapeşt, 21 aprel, AZƏRTAC
Frans Press Agentliyi Macarıstanın Baş naziri Yanoş Lazarın dəftərxanasına istinadla xəbər verir ki, Avropa İttifaqı Macarıstanın “Pakş” atom elektrik stansiyasında iki nüvə reaktorunun Rusiya texnologiyası ilə tikintisinə razılıq verib. Avropa atom enerjisi üzrə təşkilatı “Euroatom” həmin reaktorların 10 il ərzində Rusiyanın nüvə yanacağı ilə təchiz edilməsi barədə müqaviləni təsdiq edib.
İlk başdan Rusiyanın yeni reaktorları 20 il ərzində yanacaqla təchiz edəcəyi planlaşdırılmışdı. Lazarın sözlərinə görə, Brüsselin “yaşıl işığı” Rusiya-Macarıstan layihəsinin həyata keçirilməsində mühüm məqamdır, çünki Avropa Komissiyasının bu razılaşma ilə bağlı şübhələrini bildirməyə davam edəcəyi gözlənilirdi.
TASS Aİ-dəki mənbəyə istinadla xəbər verir ki, “Euroatom”un etirazlarından sonra Rusiya yanacağı ilə təchizat müddəti azaldılaraq, 20 ildən 10 ilə çatdırılıb. Rusiya agentliyi daha sonra qeyd edir ki, Avropa Komissiyası hələ bu layihəni rəsmi şəkildə təsdiq etməlidir.
Xatırladaq ki, “Financial Times” qəzetinin daha əvvəl yazdığına görə, Avropa Komissiyası texniki və maliyyə detalları ilə bağlı etirazlar üzündən Budapeşt razılaşmasını blokadaya alıb. Sonralar Brüssel bu informasiyanı təkzib edərək bildirib ki, bütövlükdə layihə üzərinə veto qoyulmayıb. Sonra Avropa Komissiyasından bildiriblər ki, etirazlar yalnız istilikayıran elementlərin təchizatı barədə müqavilə ilə bağlı olub.

Pərvanə Qarayeva
AZƏRTAC-ın xüsusi müxbiri
Budapeşt