Bakı, 21 aprel, AZƏRTAC
Bakı Beynəlxalq Multikulturalizm Mərkəzinin (BBMM) “Azərbaycan multikulturalizmi” fənninin tədrisi layihəsi çərçivəsində bu fənnin bir sıra yerli və xarici universitetlərdə tədrisi davam edir.
BBMM–dən AZƏRTAC-a bildirilib ki, dərs gedişatının keyfiyyətinə nəzarətin, fənnin tədris olunan universitetlərdə aktuallığının və onun uğurlu layihə kimi davamlılığının təmin edilməsi və fənni tədris edən müəllimlərin fərdi öhdəliklərinin yoxlanılması məqsədilə semestr ərzində iki dəfə Mərkəzin müəyyən etdiyi şəxslər tərəfindən monitorinq aparılir. Artıq bir neçə universitetdə ilk monitorinqlərə başlanılıb. Bunlardan biri də Litva Pedaqoji Universitetidir.
Bu universitetdə monitorinqin aparılması üçün BBMM tərəfindən Fəlsəfə və Hüquq İnstitutunun direktoru, professor İlham Məmmmədov ezam olunub.
Monitorinq zamanı “Azərbaycan Multikulturalizmi” fənnini Litva Pedaqoji Universitetində tədris edən professor Rəfail Həsənovun “Etnik müxtəliflik və Azərbaycan multikulturalizmi” mövzusunda mühazirəsi dinlənildikdən sonra professor İlham Məmmədov tələbələrlə görüşüb, onlar arasında sorğu keçirilib.
Sonda tələbələrin sualları cavablandırılıb və onlara BBMM tərəfindən hazırlanmış hədiyyə paketləri təqdim edilib.
Monitorinq davam edir, yeni görüşlər planlaşdırılır.