Bakı, 20 aprel, AZƏRTAC
“Khazar İslands” Azərbaycan üçün böyük əhəmiyyətə malikdir, bu layihə qeyri-neft sektorunun, xüsusilə də turizmin inkişafına güclü dəstək verəcək.
Layihəni həyata keçirən “Avesta Concern”in mətbuat xidmətindən AZƏRTAC-a bildirilib ki, bu sözləri Çin Xalq Respublikasının ölkəmizdəki fövqəladə və səlahiyyətli səfiri Xun Tsyuin
şəhər-komplekslə tanışlıq zamanı deyib.
Dünyadakı iqtisadi böhranlara baxmayaraq, Azərbaycanın daima inkişaf etdiyini vurğulayan Hacı İbrahim Nehrəmli “Khazar İslands” layihəsinin də bu inkişafın məntiqli nəticəsi olduğunu vurğulayıb.
Çin şirkətləri ilə əməkdaşlığa hazır olduğunu söyləyən Hacı İbrahim Nehrəmli bu istiqamətdə ilkin addımlar atıldığını qeyd edib və Honkonqa səfəri zamanı Çinin iki böyük “China ZK İnvestment Group” və “TSG Global” şirkətlərinin rəhbərləri ilə danışıqlar aparıldığını diqqətə çatdırıb.
Səfir Xun Tsyuin “Khazar İslands” layihəsi haqqında məlumatlı olduğunu, gördüklərinin onda dərin təəssürat yaratdığını qeyd edib. Çinli diplomat ölkəsi ilə Azərbaycan arasında siyasi münasibətlərin çox yüksək səviyyədə olduğunu söyləyib. Çin şirkətlərinin “Khazar İslands” –a qoşulmasının onlar üçün arzu edilən olduğunu deyən səfir bu layihənin Azərbaycanda sərmayə qoyuluşu üçün ən cazibədar layihə olduğunu vurğulayıb.
Səfir Xun Tsyuin ölkəsinin böyük şirkətlərinin “Khazar İslands” layihəsinə sərmayə qoyması üçün əlindən gələni edəcəyini vəd edib və bu əlaqələrin ölkələrimiz arasında münasibətlərin inkişafına da öz töhfəsini verəcəyinə əminliyini ifadə edib.