Bakı, 17 aprel, AZƏRTAC
Aprelin 16-da “Əl-Qaidə” təşkilatının Yəməndəki neft ixracı terminalını ələ keçirməsi xəbərindən sonra neftin qiymətləri qalxmağa başlayıb.
AZƏRTAC TASS informasiya agentliyinə istinadla xəbər verir ki, Londonun kontinentlər arası birjasında Brent markalı neftin barrelinin iyun ayına olan fyuçerslərinin qiyməti 0,62 faiz yüksələrək 63,94 dollardan satılıb. Nyu-Yorkun əmtəə birjasında WTI markalı neftin barrelinin may fyuçerslərinin qiyməti isə 0,79 faiz bahalaşaraq 56,64 dollarda qərarlaşıb.
Sessiyanın əvvəllərində OPEC təşkilata üzv ölkələrdə hasilatın artdığı barədə məlumatları dərc etdikdən sonra ucuzlaşan neft Yəməndən gələn xəbərlərdən sonra yenidən bahalaşaraq 64,95 dollara çatıb və bu ilin rekordunu müəyyənləşdirib.
Eyni zamanda, Səudiyyə Ərəbistanının hasilatı artırmaqda davam etdiyini bildirən LPS Partners kompaniyasının treyderləri bazarda təklifin azalacağına dair əlamətlərin görünmədiyini və hazırkı vəziyyətdə qiymət artımının uzun müddət davam etməyəcəyini qeyd ediblər.