Bakı, 17 aprel, AZƏRTAC
Aprelin 17-də Bakıda kənd təsərrüfatı nazirinin müavini Seyfəddin Talıbov Fransanın Ukraynadakı səfirliyinin Azərbaycan üzrə məsul regional kənd təsərrüfatı müşaviri Nikolya Perrən ilə görüşüb.
Nazirliyin mətbuat xidmətindən AZƏRTAC-a bildiriblər ki, görüşün məqsədi Azərbaycan ilə Fransa arasında kənd təsərrüfatı sahəsində əməkdaşlıq imkanlarının müzakirəsi olub.
Nazir müavini son dövrlərdə ölkəmizdə kənd təsərrüfatı sahəsində həyata keçirilən islahatlar, ölkə rəhbərliyinin aqrar sahəyə göstərdiyi diqqət və qayğı, qəbul olunmuş qərar və sərəncamlar barədə ətraflı məlumat verib, Azərbaycan ilə Fransa arasında kənd təsərrüfatı sahəsində əməkdaşlığı yüksək qiymətləndirib və son dövrlər bu əlaqələrin intensivləşdiyini nəzərə çatdırıb. Qeyd edilib ki, Fransanın Prezidenti Fransua Ollandın 2014-cü ilin may ayında Azərbaycana səfəri zamanı “Azərbaycan Respublikasının Kənd Təsərrüfatı Nazirliyi və Fransa Respublikasının Kənd Təsərrüfatı, Ərzaq Emalı Sənayesi və Meşəçilik Nazirliyi arasında əməkdaşlıq haqqında” Anlaşma Memorandumunun imzalanması ikitərəfli əməkdaşlığın daha da inkişafına öz töhfəsini verib.
Seyfəddin Talıbov son dövrlər ölkəmizdə aqrar sahədə baş verən köklü dəyişikliklər, xüsusilə elektron kənd təsərrüfatı sisteminin qurulması, toxum fondunun yaradılması, heyvanların identifikasiyası və qeydiyyatı barədə ətraflı məlumat verib, pendir və yağ istehsalı, süni mayalama sahələrində əməkdaşlığın prioritet sahə olduğunu deyib.
Nikolya Perrən Azərbaycanda dövlətin aqrar sahəyə xüsusi diqqət yetirdiyini, Fransanın kənd təsərrüfatı sahəsində böyük təcrübəyə malik olduğunu, ölkəsinin şərabçılıq, ət, süd istehsalı, fitosanitariya, baytarlıq sahələrində əməkdaşlığa maraq göstərdiyini qeyd edib. O, gələcəkdə ikitərəfli əməkdaşlığın inkişafına dair müzakirə olunmaq məqsədilə protokolu təqdim edib və ölkələrimiz arasında əlaqələrin daha genişlənməsində səylərini əsirgəməyəcəyini vurğulayıb.