Paytaxda Dövlət Statistika Komitəsinin qarşısındakı dairədə tıxacların aradan qaldırılması üçün əlavə tədbirlər görüləcək.

ANS TV-nin “Azəryolservis” ASC-yə istinadən verdiyi məlumata görə, İnşaatçılar prospektində yerləşən dairədə,müxtəlif istiqamətlərdən daxil olan nəqliyyat vasitələri, nişanlanma xəttinin tələbini pozur. Daha dəqiq Naxçivani küçəsindən hərəkət edən nəqliyyat vasitələri İnşaatçılar prospektindən gələn nəqliyyat vasitələrinə yol vermək əvəzinə, birbaşa dairəyə daxil olur.

Bu da ərazidə sıxlığın yaranmasına gətirib çıxarır. Yaranmış vəziyyəti aradan qaldırmaq üçün Nəqliyyat Nazirliyi “Azəryolservis” ASC yaxın günlərdə həmin ərazidə müvafiq tədbirlər görməyi planlaşdırır.

“Bir neçə gündür ki, artıq bu ərazidə işlərə start verilib. Artıq sonuncu variant üzərində iş gedir. Biz çalışırıq ki, həmin ərazidə yeni təhlükəsizlik adacığı quraşdıraq. Əraziyə səki daşları düzülsün və bundan sonra zəruri olan hərəkət istiqamətini də dəyişək. Bununla da hərəkətin normal bir şəkildə tənzimlənməsin təmin edək”, - deyə “Azəryolservis” ASC-nin mətbuat katibi Pünhan Mürsəliyev bildirib.

İlkin versiyaya görə edilən dəyişikliklərdən sonra hər iki istiqamətdən hərəkət edən avtomobillər geriyə, İnşaatçılar prospektinə dönmək üçün irəlidən quraşdırılacq yerdən dönüb geriyə hərəkət edə biləcəklər. Görüləcək işlərin qısa vaxtda başlanıb sona çatdırılması planlaşdırılır.

Mənbə
ANS TV