Bakı, 16 aprel, Ülviyyə Məmmədli, AZƏRTAC
Bakıda keçirilən “İslam maarifçiliyi və müasir dövr” mövzusunda beynəlxalq konfransın iştirakçıları üçün aprelin 16-da ziyafət verilib.
AZƏRTAC xəbər verir ki, ziyafətdə çıxış edən Qafqaz Müsəlmanları İdarəsinin sədri şeyxülislam Allahşükür Paşazadə konfransda iştirak etmək üçün Türkiyə, Rusiya, İran, Fransa, Almaniya, Küveyt, Səudiyyə Ərəbistanı, Livan, Mərakeş, İsveç, Finlandiya, Qazaxıstan, Özbəkistan və Qırğızıstan kimi ölkələrdən Azərbaycana gələn nümayəndələrə təşəkkürünü bildirib. Beynəlxalq konfransın keçirilməsinin həm ictimai-siyasi cəhətdən, həm də elmi-nəzəri baxımdan təqdirəlayiq olduğunu söyləyən şeyxülislam onun uğurlu nəticələrinin olacağına əminliyini bildirib.
Azərbaycan Milli Elmlər Akademiyasının prezidenti, akademik Akif Əlizadə önəmli məsələlərin müzakirə olunduğu konfransın məqsədlərindən söhbət açıb.
Konfransın xarici ölkələrdən olan iştirakçıları bu beynəlxalq tədbirin əhəmiyyətini yüksək qiymətləndirib, təşkilatçılara minnətdarlıqlarını bildiriblər.