Bakı, 16 aprel, AZƏRTAC
Aprelin 16-da Bakı Müasir İncəsənət Muzeyində Kolumbiyanın Azərbaycandakı səfirliyi dünya şöhrətli yazıçı Qabriel Qarsiya Markesi anma mərasimi keçirib.
AZƏRTAC xəbər verir ki, mərasimdə muzeyin icraçı direktoru Xəyyam Abdinov kolumbiyalı yazıçı, Nobel mükafatı laureatı Qabriel Qarsiya Markesin həyat və yaradıcılığından geniş söz açıb.
Bildirilib ki, yazıçının qələmindən çıxan bütün əsərlər oxucu qəlbinin dərinliklərinə yol tapıb.
Kolumbiyanın Azərbaycandakı müvəqqəti işlər vəkili Assad Xose Xater Penya Markesin dünya ədəbiyyatındakı yerindən, bənzərsiz yazı üslubundan, milyonların qəlbini fəth edən ölməz əsərlərindən danışıb.
O deyib ki, Markes söz sehirbazı idi, hamının bildiyi, danışdığı kəlmələrlə əsrarəngiz duyğular oyatmağı, oxucunu sözün qüdrətinə inandırmağı bacarırdı.
Diplomat bildirib ki, “Magik realizm” cərəyanının nümayəndəsi olan Markes 18 yaşında ikən yazmağa başlayıb.1950-ci ildə hüquq fakültəsində təhsilini yarımçıq buraxıb, özünü bütövlükdə ədəbiyyata və qəzetçiliyə həsr edib.
Bildirilib ki, Qabriel Qarsiya Markes “Taun xəstəliyi zamanı sevgi”, “100 ilin tənhalığı”, “Arzuolunmaz saat” “Patriarxın payızı”, “Düşmüş yarpaq” və digər əsərləri ilə nəinki öz ölkəsində, bütövlükdə dünyada tanınan və sevilən ən yaxşı yazıçılardan birinə çevrilib. 2014-cü il aprelin 17-də Mexikoda vəfat edən Markes romanları, povestləri, hekayələri ilə hər zaman sağdır və hər zaman anılacaqdır.
Mərasimdə kolumbiyalı yazıçı Oktavio Eskobar ədəbiyyat üzrə Nobel mükafatçısıının həyat və yaradıcılığı, həmçinin müasir Kolumbiya ədəbiyyatı haqqında danışıb.
O deyib: “Mən sevinirəm ki, bu gün Azərbaycanda belə bir tədbir təşkil olunub. Bu Qabriel Qarsiya Markesin yaradıcılığına verilən yüksək qiymətin göstəricisidir”.
Markesin özünəməxsus yaradıcılıq üslubundan söz açan qonaq deyib ki, o, həm oxucular, həm də yazıçılar arasında eyni dərəcədə əlaqə yaratmağı bacarırdı. Onun xüsusi istedadı vardı, buna görə də yazdıqları təsirli və oxunaqlı idi.
Sonda tədbir iştirakçıları kolumbiyalı fotoqraf Nereonun çəkdiyi Qabriel Qarsiya Markesin fotoşəkillərindən ibarət sərgi ilə tanış olublar.