Bakı, 16 aprel, AZƏRTAC
Qətər hökuməti cümə namazı zamanı işləyəcəyi təqdirdə ticarət və ictimai iaşə obyektləri, digər xidmət sahələri və hətta tibb müəssisələri üçün cərimə təyin edib. Bu barədə Qətərin gündəlik Peninsula qəzeti məlumat yayıb.
AZƏRTAC TASS informasiya agentliyinə istinadla xəbər verir ki, yeni qanuna görə bütün mağazalar, super-marketlər, kafe və restoranlar, firmaların ofisləri, həmçinin tibbi klinikalar öz fəaliyyətlərini namaz vaxtı 90 dəqiqə ərzində dayandırmalıdır. Bu qanuna əməl etməyən obyekt və müəssisələr 10 min Qətər rialı (2,7 min dollar) həcmində cərimələnəcək. Qanun layihəsinin təsdiq edilməsi üçün bilavasitə dövlət başçısı əmir Hamad bin Xalif əl Tani tərəfindən verildiyi bildirilir.
Qeyd edək ki, Qətər 2022-ci ildə keçiriləcək futbol üzrə dünya çempionatına ev sahibliyi edəcək. Bu turnir adətən ev sahibi olan ölkələrə yüz minlərlə azarkeşin gəlməsinə səbəb olur. 2011-ci ildə rəsmi Doha ölkədəki kafe və restoranlarda spirtli içkilərin satışına da qadağa qoymuşdu.