Ağcabədi, 16 aprel, AZƏRTAC
Ağcabədi rayonu ərazisindəki Taxtakörpü qəsəbəsində yerləşən Laçın Rayon İcra Hakimiyyətində 2015-ci ilin birinci rübünün sosial-iqtisadi yekunları və qarşıda duran vəzifələrə həsr olunmuş yığıncaq keçirilib.
AZƏRTAC xəbər verir ki, yığıncaqda görülən işlər və qarşıda duran vəzifələr barədə məruzə dinlənilib, laçınlı məcburi köçkünlərin həyat şəraitinin yaxşılaşdırılması istiqamətində işlərin davam etdirildiyi diqqətə çatdırılıb.
Bildirilib ki, Taxtakörpü ərazisində mövcud olan çınqıl örtüklü avtomobil yollarının 14 kilometr hissəsində təmir işləri aparılıb, Fingə obasında 4,4 kilometr uzunluğunda çınqıl örtüklü avtomobil yolu çəkilib. Obalarda içməli su şəbəkəsində yararsız hala düşmüş su xətlərinin 850 poqonmetr hissəsi yenisi ilə əvəz olunub, Mişni obasında su nasosu əsaslı təmir edilib. Məcburi köçkünlərin məskunlaşdığı 84 oba və 2 qəsəbədə əhalinin fasiləsiz elektrik enerjisi ilə təmin olunması üçün elektrik hava xətlərində yararsız hala düşmüş 2000 metr naqil yenilənib, Qarakeçdi, Mayis, Quşçu, Vağazin obalarında transformatorlar əsaslı təmir olunub. Rüb ərzində “Ümumrespublika yaşıllaşdırma” marafonu çərçivəsində keçirilən iməciliklərdə 3 minə yaxın ağac əkilib. Hazırda Mişni və Qarıqışlaq obalarında yeni modul tipli su təmizləyici qurğusunun tikintisi davam edir.
Əhalinin problemlərinin yerində öyrənilməsi və həlli yollarının araşdırılması məqsədi ilə 7 şəhər və rayonda 9 səyyar qəbul keçirilib.
Məruzə və çıxışlarda görülmüş işlərlə yanaşı mövcud problem və çatışmazlıqlar da qeyd olunub, 2015-ci ildə qarşıda duran vəzifələrdən danışılıb.