London, 15 aprel, AZƏRTAC
“The London Post” xəbər portalı Azərbaycanın Böyük Britaniyadakı səfiri Tahir Tağızadənin geniş müsahibəsini yayıb.
T.Tağızadə müsahibənin əvvəlində Azərbaycanın Böyük Britaniyadakı səfiri olmaqdan qürur hissi keçirdiyini söyləyib. O, etimadnaməsini təqdim edərkən Böyük Britaniya Kraliçası II Elizabetlə görüşü haqqında məlumat verib. Kraliçanın ölkələrimiz arasındakı ikitərəfli münasibətlərin inkişafından məmnun olduğunu diqqətə çatdırıb. Diplomat “Baku-2015” birinci Avropa Oyunlarının təşkilində Britaniya mütəxəssisləri və şirkətləri ilə sıx əlaqələr qurulmasından bəhs edib.
T.Tağızadə müsahibəsində Britaniya ilə Azərbaycan arasındakı münasibətlərin inkişafından da danışıb. Xüsusilə enerji sahəsində əməkdaşlığın yüksək səviyyədə olduğunu vurğulayıb. İki ölkə arasında siyasi, hərbi, təhlükəsizlik məsələlərinin, beynəlxalq təşkilatlar çərçivəsində əməkdaşlığın daha da inkişaf etdirilməsinin prioritet olduğunu bildirib. Diplomat qeyd edib ki, artıq qeyri-enerji sektorunda əməkdaşlığın inkişafı üçün də geniş imkanlar mövcuddur. Hazırda Azərbaycanda qeyri-enerji və sənaye sahələrinin sürətli inkişafı diqqət mərkəzində olan məsələdir.
Səfir “Bakı-2015” birinci Avropa Oyunlarına hazırlıq işləri, yeni tikilən idman obyektləri haqqında da ətraflı məlumat verib.
Ermənistan-Azərbaycan, Dağlıq Qarabağ münaqişəsinə toxunan səfir doğma torpaqlarımızın işğalçı ölkə tərəfindən zəbt edildiyini bildirib, bir milyondan artıq qaçqın və məcburi köçkünümüzün olduğunu diqqətə çatdırıb. Diplomat deyib: “Münaqişənin həllinə dair mövqeyimiz beynəlxalq hüququn fundamental prinsiplərinə əsaslanır və Azərbaycanın ərazi bütövlüyünün qorunub saxlanılmasını nəzərdə tutur”.
Beynəlxalq ictimaiyyətin münaqişə ilə bağlı mövqeyi haqqında suala cavab verən T. Tağızadə diqqətə çatdırıb ki, dünyadakı digər münaqişələrdə olduğu kimi, Dağlıq Qarabağ münaqişəsinə də ciddi yanaşılmalı, Azərbaycanın ərazi bütövlüyü təmin edilməli, Xocalı soyqırımı kimi faktlara diqqət cəlb edilməlidir. Heydər Əliyev Fondunun vitse-prezidenti Leyla Əliyevanın rəhbərliyi ilə “Xocalıya ədalət!” beynəlxalq təbliğat və təşviqat kampaniyası çərçivəsində artıq bir sıra uğurların əldə edildiyi, Çexiya, Pakistan, Bosniya və Herseqovinya, Peru kimi ölkələrin bu soyqırımını tanıdıqları vurğulanıb.


Orxan İsmayılov
AZƏRTAC-ın xüsusi müxbiri
London