Bakı, 15 aprel, AZƏRTAC
Bakı Beynəlxalq Muıtikulturalizm Mərkəzinin (BBMM) layihəsi çərçivəsində Litva Pedaqoji Universitetində “Azərbaycan multikulturalizmi” fənnini tədris edən professor Rafael Həsənov Vilnüs Universitetinin filologiya fakültəsində “Azərbaycanda multikonfesionalizm və multikulturalizm” mövzusunda mühazirə oxuyub.
BANM-dən AZƏRTAC-a bildiriblər ki, professor R.Həsənov bu ali məktəbdə mühazirə oxumağa Litva Təhsil Universitetinin Beynəlxalq Münasibətlər departamentinin müdiri, Vilnüs Universitetinin dosenti Loreta Çodzkiene tərəfindən dəvət olunub.
Əvvəlcə Azərbaycan haqqında film nümayiş etdirilib.
Mühazirədə Litva Pedaqoji Universitetində “Azərbaycan multikulturalizmi” fənni üzrə təhsil alan tələbələrlə yanaşı, Vilnüs Universitetində təhsil alan, İtaliya, Cənubi Koreya, İspaniya və digər ölkələrdən olan tələbələr və universitetin müəllimləri də iştirak ediblər. İştirakçılar mühazirəyə çox böyük maraq göstərib və Azərbaycana gəlmək arzusunda olduqlarını bildiriblər.
Sonda R.Həsənov tələbələrin Azərbaycanın multikulturalizm siyasəti barədə sualların cavablandırıb.