Bakı, 15 aprel, AZƏRTAC
Rusiya Prezidenti Vladimir Putinin və hökumət başçısı Dimitri Medvedyevin 2014-cü il üçün gəlirləri haqda məlumatlar Kremlin və Nazirlər Kabinetinin saytlarında dərc olunub.
AZƏRTAC Rusiyanın NTV telekanalına istinadla xəbər verir ki, bu məlumatlara əsasən, Vladimir Putin 2014-cü ildə 7,5 milyon rubl qazanıb. Bu, 2013-cü illə müqayisədə 2,5 dəfə çoxdur. Həmin il dövlət başçısı 3,6 milyon rubl gəlir əldə etmişdi.
Bununla yanaşı, Prezidentin əmlakının siyahısı bir neçə ildir ki, dəyişməz qalır. Vladimir Putin 77 kvadrat metrlık mənzilə və 1500 kvadrat metrlik torpaq sahəsinə malikdir. Bundan başqa, dövlət başçısının istifadəsinə 153,7 kvadrat metrlik yaşayiş sahəsi və 18 kvadrat metrlik avtomobil qarajı da verilib. Eyni zamanda onun əmlakına əvvəlki ildəki kimi 3 avtomobil - QAZ M-21, QAZ M-21R, “Niva” və “Skif” avtomobil qoşqusu da daxildir.
Hökumət başçısı Dimitri Medvedyev isə 2014-cü ildə əvvəlki illə müqayisədə təxminən iki dəfə çox - 8 510 573 rubl qazanıb. 2013-cü ildə onun qazancı 4 milyon rubldan bir qədər artıq olmuşdu.
Dimitri Medvedyevin də əmlaki 2013-cü illə müqayisədə dəyişməz qalıb. Yenə də əvvəlki kimi 367 kvadrat metrlik mənzilə sahib olan hökumət başçısı 4 700 kvadrat metrlik torpaq sahəsini də 49 illik icarəyə götürüb. O, həmçinin QAZ-20 və QAZ-21, həyat yoldaşı isə əvvəlki kimi Volkswagen Golf markalı avtomobillərə sahibdirlər.