Bakı, 14 aprel, AZƏRTAC
Azərbaycan Tibb Universitetində (ATU) tələbələr üçün ödənişsiz xarici dil kursları təşkil edilib. Dərslər həftədə iki dəfə - şənbə və bazar günləri ATU-nun tədris binasında (fizika-kimya korpusu) keçirilir.
Universitetdən AZƏRTAC-a bildiriblər ki, müasir dövrdə gənclərin xarici dilləri, xüsusilə də ingilis dilini bilməsi çox önəmlidir. Dil bacarıqları tələbələrin beynəlxalq təcrübəni daha yaxşı mənimsəmələrinə, əlaqələrin genişləndirilməsinə, konkret fənn ilə bağlı daha çox bilik əldə etməyə imkan verir. Tibb elmi daim inkişaf edən bir sahə olduğu üçün ingilis dili bilikləri ATU-nun tələbələri üçün daha çox əhəmiyyət kəsb edir. Bu məsələdə tələbələrə kömək göstərmək məqsədilə universitetin rektoru, Milli Məclisin deputatı, akademik Əhliman Əmiraslanovun dəstəyi ilə tələbə həmkarlar ittifaqı komitəsinin nəzdində tələbələr üçün pulsuz danışıq kursları təşkil edilib.
Komitənin sədri, dosent Elşad Novruzovun sözlərinə görə, bu kurslarda ingilis dilində başlanğıc və orta səviyyələr üçün xüsusi proqramlaşdırılmış dərslər keçirilir. Kursların tamamilə ödənişsiz olduğunu xüsusi qeyd etmək lazımdır. Bu, tələbələrin xarici dillərlə daha intensiv məşğul olmalarına imkan yaradacaq.
Qeyd edək ki, ingilis dilində danışıq klubunun yaradılması layihəsi ATU-nun II müalicə profilaktika fakültəsinin üçüncü kurs tələbəsi Sərxan Həsənlinin rəhbərliyi ilə icra olunur.
Kursda iştirak etmək üçün facebookda “Medicalconversationamu” qrupuna qatılmaq lazımdır.