Bakı, 13 aprel, AZƏRTAC
Azərbaycan təbii qazının gələcəkdə “Cənub” qaz dəhlizi vasitəsilə Serbiyaya da nəql edilməsinə böyük ümid bəsləyirik. Azərbaycanın “Şahdəniz” və digər qaz yataqlarından hasil olunacaq təbii qaz həcmlərinin Serbiyanın ehtiyaclarını qarşılanmasına prioritet kimi baxılır.
Azərbaycan Respublikası Dövlət Neft Şirkətinin (SOCAR) mətbuat xidmətindən AZƏRTAC-a verilən məlumata görə, bu fikirlər aprelin 14-də SOCAR-ın prezidenti Rövnəq Abdullayevlə Serbiya Respublikasının Baş naziri Aleksandr Vuçiçin rəhbərlik etdiyi nümayəndə heyəti arasında keçirilən görüşdə səsləndirilib.
Görüşdə SOCAR-ın prezidenti R.Abdullayev Azərbaycan və Serbiya arasında münasibətlərin yüksək səviyyədə olduğunu, siyasi, iqtisadi və humanitar sahələrdə ikitərəfli əlaqələrin uğurla inkişaf etdiyini vurğulayıb, qarşılıqlı faydalı əməkdaşlıq üçün əlverişli perspektivlər olduğunu bildirib. Azərbaycana səfərindən məmnun olduğunu deyən Serbiyanın Baş naziri Aleksandr Vuçiç iki ölkə arasında iqtisadi əlaqələrin inkişaf etdirilməsinin vacibliyini qeyd edib, “Cənub” qaz dəhlizi layihəsinə böyük maraq göstərdiklərini deyib.
R.Abdullayev Azərbaycanın qədim neft diyarı olduğunu, Bakı neftçilərinin dünya neft sənayesinin inkişafına əvəzolunmaz töhfələr verdiyini xatırladaraq, bildirib ki, Azərbaycan xalqının ümummilli lideri Heydər Əliyev tərəfindən əsası qoyulan enerji strategiyası hazırda Prezident İlham Əliyevin rəhbərliyi altında uğurla davam etdirilir. Qonaqlara SOCAR haqqında ətraflı məlumat verən R.Abdullayev şirkətin Azərbaycanda həyata keçirilən regional və qlobal əhəmiyyətli layihələrin əsas iştirakçısı olduğunu vurğulayıb, bu layihələrin uğurla həyata keçirilməsində onun rolundan və fəaliyyət istiqamətlərindən söhbət açıb.
“Cənub” qaz dəhlizinin Avropanın enerji təhlükəsizliyində mühüm yer tutduğunu vurğulayan SOCAR-ın prezidenti “Şahdəniz-2” layihəsinin bu dəhlizin açılmasında ilk və vacib əhəmiyyətli mərhələ olduğunu qeyd edib. O, eyni zamanda bildirib ki, Azərbaycanda kəşf olunmuş “Ümid”, “Abşeron” yataqlarının və digər perspektivli strukturların işlənilməsi də “Cənub” qaz dəhlizinin gələcəyi ilə sıx bağlıdır.
Serbiyanın Baş naziri Azərbaycanın son illər etibarlı neft və qaz təchizatçısı kimi tanındığını diqqətə çatdırıb, ölkəmizdə hasil olunacaq təbii qazın gələcəkdə “Cənub” qaz dəhlizi vasitəsilə Serbiyaya da nəql ediləcəyinə böyük ümid bəslədiklərini deyib.
Görüşdə tərəfləri maraqlandıran digər məsələlər ətrafında da fikir mübadiləsi aparılıb.