Bakı, 13 aprel, AZƏRTAC
Paris şəhər şurası 2024-cü il Yay Olimpiya Oyunlarının keçirilməsi üçün bu şəhərin namizədliyinin irəli sürülməsi təklifini bəyənib. Bu barədə məlumat Fransa Milli Olimpiya Komitəsinin (MOK) Twitter mikrobloqundakı rəsmi səhifəsində yayılıb.
AZƏRTAC xarici KİV-lərə istinadla xəbər verir ki, Fransa paytaxtının şəhər şurasında bu məsələyə dair səsvermə bazar ertəsi, aprelin 13-də keçirilib. RİA “Novosti” agentliyinin verdiyi məlumata görə, Parisin sifarişinin iyun ayında Beynəlxalq Olimpiya Komitəsinə (BOK) göndərilməsi gözlənilir.
Xatırladaq ki, indiyə qədər Paris iki dəfə – 1900-cü və 1924-cü illərdə - Yay Olimpiya Oyunlarının paytaxtı rolunda çıxış edib.
Bundan əvvəl Boston (ABŞ), Hamburq (Almaniya) və Roma (İtaliya) şəhərləri 2024-cü il Olimpiya Oyunlarına ev sahibliyi etmək barədə öz təkliflərini irəli sürüb. Məlumata görə, Hindistanın Əhmədabad şəhəri də həmin Olimpiadaya ev sahibliyi etməyə namizəd ola bilər.
2024-cü il Olimpiadasının keçirilməsi üçün sifarişlər verilməsi müddəti bu il sentyabr ayında başa çatır. Həmin Olimpiya Oyunlarının keçiriləcəyi yer haqqında qərar isə 2017-ci ildə BOK-un sessiyasında qəbul ediləcək.