Bakı, 13 aprel, AZƏRTAC
Azərbaycan Milli Elmlər Akademiyasının (AMEA) əsas binasından nəşrlərin Mərkəzi Elmi Kitabxanaya (MEK) köçürülməsi prosesi davam edir. Bu günədək təxminən bir milyon kitab köçürülüb.
Bu barədə AZƏRTAC-a MEK-in direktoru Leyla İmanova məlumat verib. Bildirilib ki, kitabxananın işçilərinin, eləcə də Respublika Mülki Müdafiə qüvvələri və Gənc Ərəbşünaslar Şəbəkəsi könüllülərinin köməyi ilə köçürülmə prosesinə ötən ilin noyabrından başlanıb. Kitab, jurnal və qəzetlər təmizləndikdən sonra formatına və şöbəsinə görə qutulara qablaşdırılaraq əsas binadan MEK-ə gətirilir. Nəşrlər yeni binada məxsusi kitab saxlancı üçün hazırlanmış, yəni optimal temperatur, işıq, rütubət, yanğına qarşı tədbirləri təmin edən sistemlərin qurulduğu zallarda yerləşdirilir.
L.İmanovanın sözlərinə görə, kitabxananın nadir kitab, qərbi Avropa ədəbiyyatı və şərq ədəbiyyatı fondlarının kitabları tamamilə köçürülüb. Şərq ədəbiyyatı və nadir kitab fondlarındakı kitabların hamısına, qərbi Avropa ədəbiyyatı fondundakı kitabların isə bir qisminə elektron çiplər və inventar nömrələri (ştrix kodlar) vurulub. Köçürmə prosesini sürətləndirmək üçün lazımi tədbirlər görülür.