Moskva, 13 aprel, AZƏRTAC 
Moskva Mərkəzi Ədiblər evində azərbaycanlı yazıçıların növbəti toplantısı keçirilib.
Moskva şəhərində yaşayan yazıçılarımızın Şəhriyar Ədəbi Mədəni cəmiyyətinin üzvlərinin iştirak etdiyi toplantıda bir çox mühüm məsələlər müzakirə edilib.
İclası Azərbaycan və Rusiya Yazıçılar birliklərinin üzvü, şair Nəsib Nəbioğlu açaraq, Rusiyanın “Literaturnaya qazeta” nəşrinin həftəlik “Slovestnik” əlavəsində şeirləri dərc olunan şairləri bu böyük uğur münasibətilə təbrik edərək bildirib ki, Moskvada yaşayan Azərbaycan şairlərinin yaradıcılığına həsr olunmuş bu aləvədə, 21 Azərbaycan şairinin 72 şeiri yer alıb. Belə bir nüfuzlu qəzetdə Azərbaycan poeziyasının müasir mənzərəsinin rus oxucularına çatdırılması təqdirəlayiq bir hadisədir. Natiq “Literaturnaya qazeta”da bu sayda azərbaycanlı şairin şeirlərinin ilk dəfə dərc edilməsini Azərbaycan poeziyasının uğuru kimi dəyərləndirib, əlavənin işıq üzü görməsinə verdiyi dəstəyə görə Rusiyanın Əməkdar İnşaatçısı, iş adamı Əlizaman Rəhimova, ədəbiyyatşünas Abuzər Bağırova təşəkkürünü bildirib, gələcəkdə “Literaturnaya qazeta”nın səhifələrində müntəzəm olaraq Azərbaycan yazıçılarının müxtəlif janrlarda əsərlərinin dərc olunacağını vurğulayıb.
Tədbirdə “Şəhriyar” Ədəbi Mədəni Cəmiyyətinin sədri Vasif Məmmədov, şairlər Afaq Şıxlı, Valeh Saleh və başqaları çıxış ediblər.
Fəridə Abdullayeva
AZƏRTAC-ın xüsusi müxbiri
Moskva