Bakı, 11 aprel, AZƏRTAC
Xəbər verdiyimiz kimi, aprelin 10-da “British Airways” aviaşirkətinin Bakıdan Londona uçan təyyarəsi Heydər Əliyev Beynəlxalq Aeroportunda məcburi eniş edib.
AZƏRTAC bildirilir ki, bununla bağlı “British Airways” bu gün məlumat yayıb.
Məlumatda deyilir: “Bakı-London istiqamətində uçan avialaynerin kapitanı təyyarənin mühərriklərinin birində nasazlıqdan şübhələnib. Təyyarə havaya qalxıqdan az sonra kapitan yenidən Bakıya qayıtmaq qərarını verib. Bütün sərnişinlər digər aviaxətlərlə Londona göndərilib”. Şirkət müştərilərinin səyahətlərini ləngitdiyi üçün təəssüfləndiyini də qeyd edib.
Xatırladaq ki, həmin təyyarənin sərnişinlərindən 36 nəfəri “Lufthansa” şirkətinin təyyarəsi ilə bu gün Londona yola salınıb. Digər sərnişinlər də bu gün axşam saatlarında Böyük Britaniyanın paytaxtına yola salınacaqlar.