Bakı, 11 aprel, AZƏRTAC
Dünya şöhrətli futbolçular Ronaldonun və Zinəddin Zidanın aprelin 20-də Sent-Etyen şəhərinin stadionunda təşkil edəcəkləri “Yoxsulluğa qarşı oyun”un biletləri artıq satışa çıxarılıb. Xeyriyyə məqsədilə keçiriləcək oyundan əldə edilən gəlir Ebola virusundan əziyyət çəkən Cənubi Afrika ölkələrinə göndəriləcək.
AZƏRTAC TASS informasiya agentliyinə istinadla xəbər verir ki, FİFA və UEFA-nın dəstəyi ilə keçiriləcək oyun bütün dünyada yayımlanacaq. Jofrua Qişar stadionunda baş tutacaq oyunda Fransanın “Sent-Etyen” klubunun hazırkı və veteran futbolçuları Zidan və Ronaldonun komandası ilə qarşılaşacaqlar. “Ulduzlar” komandasına Fabyen Bartez, Erik Abidal, Kafu, Klarens Zidorf, Edvin van der Sar, Yuriy Corkaeff və Rober Pires kimi futbolçular daxildir.
Xatırladaq ki, “Yoxsulluğa qarşı oyun” BMT İnkişaf Proqramının “Xoşməramlı səfirlər”i olan Zidan və Ronaldonun təşəbbüsü ilə ilk dəfə 2003-cü ildə keçirilib.