Ölkəmizdə əmək bazarında peşələrə tələb yetərincədir. Ancaq peşə məktəblərinə üz tutmaq istəyənlər, təəssüflər olsun ki, ali məktəblərə daxil olmaq istəyənlərlə müqayisədə azlıq təşkil edir. Ölkəmizdə peşə təhsilindəki vəziyyət isə birmənalı deyil.

Ekspertlər buna bir neçə səbəb gətirirlər. Onların fikrincə, gənclər bu təhsil müəssələrinin bir çoxunun maddi-texniki bazasının yətərli olmaması, müasir avadanlıq, texnikayla təchiz olunmaması səbəbindən getmək istəmirlər. Bu səbəbdən peşə məktəblərində təhsil alan tələbələr seçdikləri ixtisaslar üzrə yaxşı peşə sahibləri olmurlar.

Həmçinin mütəxəssislərin fikrincə, yaxşı peşə sahibi olmaq üçün iki və ya iki il yarım təhsil almaq kifayət deyil. Bunun üçün bir sıra xarici ölkələr peşə sirlərinə məktəbin kiçik siniflərindən öyrənməyə başlayırlar.

“Buna nümunə kimi Hollandiyanı göstərmək olar. Bu ölkədə 4-cü sinfdən başlayaraq şagirdlərə əməyin tədrisi aşılanır. Məhz 4-cü sinfdən etibarən şagirdlər arasından peşə sahiblərinin seçiminə start verilir. Seçilən uşaqlar ümumtəhsil məktəblərinə göndərilir. Amma ümumtəhsil məktəblərin proqramı isə fərqlənir. Orda 4-cü sinfdən 9-cu sinifə, yəni 5 il ərzində şagirdlər peşənin sirlərini öyrədirlər. Amma Azərbaycanda hansısa, bir peşənin tədris edən bəzi peşə məktəblərinin maddi-texniki bazası yetərli səviyyədə deyil”, – deyə təhsil üzrə ekspert Nabatəli Qulamoğlu bildirib.

Təhsil nazirliyinin elm və ali təhsil şöbəsinin müdiri Sülhəddin Gözəlov hesab edir ki, son illər peşə məktəblərinə abituriyentlərin marağı artıb. Bu da peşə məktəblərinin müasir avadanlıqlarla təchiz olunması ilə əlaqədardır. Ümumiyyətlə ölkədə bu sahədə inkişafa doğru müəyyən addımlar atılmaqdadır:

“Son illər peşə məktəblərinə maraq artıb. Artım da ondan irəli gəlir ki, peşə məktəblərin maddi-texniki bazası yenilənir. Hazırda Təhsil Nazirliyi bu sahəyə olan marağı nəzərə alaraq, lazımi işlər görür”.

Hər halda, ölkə iqtisadiyyatının inkişafına təkcə düşünən beyinlər deyil, işləyən əllər də lazımdır. Aşağı göstəricilərlə universitetlərdə təhsil almaqdansa, yaxşı peşə sahibi olmaq daha düzgün olardı.

Necə ki, görkəmli azərbaycan şairi Nizami Gəncəvinin misralarında deyildiyi kimi: “Kamil bir palançı olsa da insan, yaxşıdır yarımçıq papaqçılıqdan”.

Mənbə
ANS-TV- Nərgiz Tahirova