Bakı, 10 aprel, AZƏRTAC
Aprelin 10-da Azərbaycan Milli Elmlər Akademiyasının (AMEA) rəyasət heyətində AMEA-nın Biologiya və Tibb Elmləri Bölməsinin (BTEB) növbəti büro iclası keçirilib.
AMEA-dan AZƏRTAC-a bildiriblər ki, iclasda bölmənin akademik-katibi, akademik Əhliman Əmiraslanov gündəlikdəki məsələlər barədə məlumat verib.
Tədbirdə AMEA-nın aprelin 29-da keçiriləcək illik ümumi yığıncağına hazırlıqla bağlı məsələlər müzakirə edilib. Bildirilib ki, ümumi yığıncaqda akademiyanın 2014-cü ildəki fəaliyyəti haqqında hesabat, AMEA-nın vitse-prezidenti vəzifəsinə və bir sıra bölmələrin akademik-katibi vəzifəsinə seçkilərin keçirilməsi və s. məsələlər yer alıb.
Sonra AMEA-nın daimi fəaliyyət göstərən Elmi Nailiyyətlər Sərgisinin işçi qrupunun rəhbəri, tarix üzrə fəlsəfə doktoru Nuridə Quliyeva akademiyanın ümumi yığıncağında BTEB tərəfindən nümayiş etdiriləcək sərginin təşkili ilə bağlı məlumat verib.
İclasda AMEA-nın Dendrologiya İnstitutunun Nizamnaməsi və 2015-ci il üzrə elmi-tədqiqat planları, akademik İradə Hüseynovanın 50, akademik Seyfəddin Əliyevin 85 illik yubileyləri, ”Azərbaycanın şirin sularının diatom yosunları” əlyazmasının AMEA-nın 2015-ci il üzrə nəşriyyat tematik planına daxil edilməsi və bir sıra kadr məsələləri müzakirə olunub.