ABŞ Energetika Nazirliyi dünyanın ən sürətli superkompüterinin yaradılmasına 200 milyon dollar ayırmasını açıqlayıb.
 
“Aurora” adlanan superkompüterin hazırlanması nazirliyə məxsus Arqonn Milli Laboratoriyasına (Argonne National Laboratory) həvalə olunub. Dünyanın ən güclü “elektron beyini” burada yerləşəcək.
 
Yerinə yetirilən əməliyyatların sürətinə görə "Aurora”nın dünyada hazırkı ən sürətli analoqlarını 5-7 dəfə üstələyəcəyi nəzərdə tutulur.
 
“Aurora” superkompüteri aşağı karbon energetikasının gələcək inkişafına xidmət edəcək və bizim Yer kürəsi haqqında əsas biliklərimizi genişləndirəcək”, - energetika nazirinin müavini Linn Orr bildirib.
 
Superkompüterin yaradılmasında məqsəd ABŞ-a bu sahədə digər dövlətlərlə uğurlu rəqabət aparmağa imkan yaratmaq və ölkənin iqtisadi və milli təhlükəsizliyinin təmininə zəmanət verməkdir.  
 
Bildirilir ki, “Aurora” daha güclü və effektiv akkumulyator, eləcə də günəş panelləri batareyalarının yaradılmasına imkan verəcək materialların hazırlanmasına kömək edəcək.
 
Kompüterdən, həmçinin bioloji tədqiqatlarda və bərpa olunan enerji mənbələrinin mənimsənilməsi üzrə axtarışlarda istifadə nəzərdə tutulur.   
 
Superkompüterin 2019-cu ildə işə salınması gözlənilir, - “TASS” yazır.