Mingəçevir, 10 aprel, AZƏRTAC
Mingəçevir şəhər məktəblilərinin iştirakı ilə “Zərərli vərdişlərin qarşısının alınması və uşaq hüquqlarının qorunması” mövzusunda tədbir keçirilib.
AZƏRTAC xəbər verir ki, tədbirdə şəhər icra hakimiyyətinin, polis şöbəsinin, narkoloji dispanserin, təhsil şöbəsinin işçiləri çıxış edərək yeniyetmələrin zərərli vərdişlərə aludə olmasının cəmiyyətimizə ciddi təsir etdiyini qeyd edib, siqaretin, spirtli içkilərə aludəçiliyin fəsadlarından ətraflı danışıblar.
Tədbirdə şagirdlərə narkomaniya və onun acı fəsadları ilə bağlı geniş məlumat verilib, “ağ ölüm”ün cəmiyyət üçün yaratdığı ciddi problemlər diqqətə çatdırılıb. Uşaq hüquqlarının qorunmasından danışan natiqlər qeyd ediblər ki, hər bir uşağın yaşamaq, təhsil almaq, müdafiə olunmaq hüquqları var. Buna görə də hər bir şagird öz hüquq və vəzifələrini bilməlidir. Zərərli vərdişlər və uşaq əməyinin istismarı bu gün cəmiyyətin ən ağrılı problemlərindən birinə çevrilib. Tədricən cəmiyyətin məhvinə gətirib çıxara biləcək bu kimi problemlərə qarşı mübarizə tədbirlərini daha da gücləndirməyin vacibliyi qeyd edilib. Tədbirdə məktəblilərə dərsdən yayınmamaları, bu cür pis vərdişlərdən uzaq olmaları və boş vaxtlarından səmərəli istifadə etmələri məsləhət görülüb.