Gəncə, 10 aprel, Sabir Əliyev, AZƏRTAC
Gəncədə “Gəncə-2016: Gələcəyə baxış” mövzusunda beynəlxalq forum işə başlayıb.
AZƏRTAC xəbər verir ki, Azərbaycan Respublikası Gənclər Təşkilatları Milli Şurasının (ARGTMŞ), Gənclər və İdman Nazirliyinin, Azərbaycan Respublikası Prezidenti yanında Gənclər Fondunun və Gəncə Şəhər İcra Hakimiyyətinin dəstəyi ilə keçirilən forumda 150-dən artıq nümayəndə, o cümlədən Avropa Gənclər Forumunun üzvləri, “Gəncə 2016-Avropa Gənclər Paytaxtı” Təşkilat Komitəsinin, Belçika, İtaliya, Hollandiya, Portuqaliya, Sloveniya, Yunanıstan və Rumıniya Gənclər Təşkilatları Milli şuralarının rəhbərləri, eləcə də ARGTMŞ-in əməkdaşları iştirak edirlər.
Forumu Gəncə Şəhər İcra Hakimiyyəti başçısının birinci müavini Naqif Həmzəyev açaraq, Gəncənin 2016-cı il Avropa Gənclər Paytaxtı seçilməsini Azərbaycan gənclərinin həyatında əlamətdar hadisə adlandırıb və bu uğuru dövlətimizin başçısı İlham Əliyevin Azərbaycan gəncliyinə göstərdiyi diqqət və qayğının nəticəsi kimi dəyərləndirib. Bildirib ki, ölkəmizdə gənclər siyasəti sahəsində həyata keçirilən məqsədyönlü tədbirlər bu gün də uğurla davam etdirilir.
Sonra ARGTMŞ-in sədri Şahin Seyidzadə, Azərbaycan Respublikası Prezidenti yanında Gənclər Fondunun nümayəndəsi Orxan Ərəbov çıxış edərək diqqətə çatdırıblar ki, beynəlxalq forumun keçirilməsinin əsas məqsədi Avropa Gənclər Paytaxtı sahəsində xarici təcrübənin öyrənilməsi, Gəncə şəhərində Avropa Gənclər Paytaxtı ilə bağlı görülən və görülməsi planlaşdırılan işlərin təqdimatı, yerli gənclər təşkilatlarının xarici və beynəlxalq gənclər platformaları ilə əməkdaşlığının qurulması və inkişaf etdirilməsinə dəstək verilməsidir.
“Gəncə: Avropa Gənclər Paytaxtı - 2016” layihəsinin təqdimatından sonra forum işini bölmələrdə davam etdirib.
Forumda iştirakçılar arasında təcrübə mübadiləsi aparılıb, müxtəlif mövzularda sessiyalar keçirilib, görülmüş və görüləcək işlər müzakirə edilib. Həmçinin Avropa Gənclər paytaxtları olmuş ölkələrin nümayəndələrinin tövsiyə və təklifləri dinlənilib.
Aprelin 11-dək davam edəcək forum çərçivəsində iştirakçılar Gəncə şəhərinin görməli yerlərinə ekskursiyalar edəcək, tarixi abidələrlə tanış olacaqlar.