Ötən gün Xəzərdə itkin düşən üç sumqayıt sakinin axtarışları davam edir.

ANS TV-nin məlumatına görə, iki gün əvvəl Xəzər dənizində itkin düşən sumqayıtlı üç balıqçıdan hələ də bir xəbər yoxdur. İtkin düşən balıqçılar Hacı Zeynalabdin Tağıyev qəsəbə sakinləridir. Onlardan ikisi ata Əliyev Azad və oğul Əliyev Mübariz digəri isə qonşuluqda yaşayan Kərimov Pərvizdir.

Qohumlarının dediyinə görə, 62 yaşlı Azad Əliyev illərin balıqçısı olub. 4 oğul atası övladları ilə birgə balıqçılıq edərək dolanırmış. Hadisə baş verən gün, yəni aprelin 7-də balıqçılar havanın sakit olmasından istifadə edərək yenə dənizə çıxıblar.

“Ümid edirik ki, sağdılar, gələcəklər. Onları gözləyirik. Bununla bağlı məlumat da verilmir. Köməklik edən yoxdur”, - deyə oğul Vüsal Əliyev bildirib.

İtkin düşən balıqçıların axtarışları dünən bütün gün davam edib. Axtarışlara havadan helikopterlərlərlə dəstək verilib. Bunun nəticəsi olaraq onların qayıqları dənizin Siyəzən istiqamətində Zarat deyilən ərazidə tapılıb.

Qonşuluqda yaşayan digər balıqçı 29 yaşlı Pərviz Kərimovun da ailəsində hüzn hökm sürür. Oğlunu tək başına böyütdüyünü deyən Qızbəs xanım axtarış işlərindən narazılıq edir:

“Xahiş edirəm aidiyyati qurumlar axtarş işlərini sürətləndirsinlər. Uşağımın meytini axtarıb tapsınlar. Hazırda axtarış işləri istənilən kimi həyata keçirilmir”.

İtkin düşən balıqçıların bütün sənədlərinin qaydasında olduğunu öyrəndik.

Fövqəladə Hallar Nazirliyinin rəsmisi Oqtay Bayramov ANS-ə açıqlamasında helikopter əməliyyatlarına ara verilsə də, dənizdəki axtarışların davam etdiyini dedi.

Mənbə
ANS TV: Ayşəm Rüstəmova