Tokio, 9 aprel, AZƏRTAC 
Aprelin 15-də Azərbaycan Dövlət İnformasiya Agentliyi (AZƏRTAC) ilə Yaponiyanın JIJI PRESS informasiya agentliyi arasında əməkdaşlıq haqqında saziş imzalanacaq.
İki ölkənin aparıcı agentlikləri arasında sazişin imzalanması barədə razılıq AZƏRTAC-ın baş direktoru Aslan Aslanovun 2012-ci ilin noyabr-dekabrında Yaponiyaya səfəri zamanı JIJI PRESS agentliyinin rəhbərliyi ilə aparılmış müzakirələr zamanı əldə edilib. Ötən dövrdə agentliklərin ekspertləri tərəfindən saziş layihəsi üzərində iş davam etdirilib və hər iki tərəfi qane edən son variant hazırlanıb.
JIJI PRESS agentliyinin icraçı direktoru Sadafumi Taninin Azərbaycana səfəri zamanı imzalanacaq sazişə əsasən tərəflər arasında əməkdaşlıq əlaqələrinin genişləndirilməsi, təcrübə mübadiləsi məqsədilə qarşılıqlı səfərlərin təşkili, eyni zamanda, agentliklərin saytlarında ölkələrimizdə baş verən hadisələr barədə informasiyaların mütəmadi yerləşdirilməsi nəzərdə tutulur.
Saziş Azərbaycan haqqında həqiqətlərin Yaponiyanın bu agentliyi vasitəsilə yayılması, ölkəmizin uğurlarının təbliği baxımından xüsusi əhəmiyyətə malikdir.
Səfər zamanı S.Tanini müşayiət edəcək agentliyin beynəlxalq əlaqələr şöbəsinin müdiri Hiroşi Masuda AZƏRTAC-ın Yaponiyadakı xüsusi müxbirinə bildirib ki, JIJI PRESS son illər sürətlə inkişaf edərək regionun lider dövlətinə çevrilən Azərbaycanın milli informasiya agentliyinin fəaliyyətini diqqətlə izləyir və AZƏRTAC ilə əməkdaşlıqda maraqlıdır. İmzalanacaq bu saziş, eyni zamanda, Azərbaycan ilə Yaponiya arasında informasiya mübadiləsi sahəsində əlaqələrin daha da genişləndirilməsində mühüm rol oynayacaq.
AZƏRTAC 2010-cu ildən Yaponiyanın daha bir nüfuzlu informasiya agentliyi – Kyodo ilə ikitərəfli saziş əsasında əməkdaşlıq edir. Asiya və Sakit Okean Ölkələri İnformasiya Agentlikləri Təşkilatının (OANA) büro üzvü və vitse-prezidenti olan AZƏRTAC bu qurum çərçivəsində də Yaponiyanın hər iki agentliyi ilə fəal əlaqələrə malikdir.
Vüqar Ağayev
AZƏRTAC-ın xüsusi müxbiri
Tokio