Daşkənd, 9 aprel, AZƏRTAC
Daşkənddəki silkway.uz və uchildiz.uz portalalrında Azərbaycanın qədim musiqi aləti tar haqqında material çap olunub.
Azərbaycanın Özbəkistandakı səfirliyi və bu qurumun nəzdindəki Heydər Əliyev adına Azərbaycan Mədəniyyət Mərkəzinin təşəbbüsü ilə rus dilində çap edilən materialda Azərbaycanın tar ifaçılığı sənətinin UNESCO-nun qeyri-maddi mədəni irs siyahısına daxil edilməsindən söz açılıb. Diqqətə çatdırılıb ki, bu Azərbaycanın birinci xanımı, UNESCO və İSESCO-nun xoşməramlı səfiri, Heydər Əliyev Fondunun prezidenti Mehriban Əliyevanın təşəbbüsləri və dəstəyi ilə həyata keçirilən silsilə tədbirlərdən biridir.
Məqalədə bildirilib ki, orta əsrlərdə Qətran Təbrizi, Əssar Təbrizi, Məhəmməd Füzuli, Qövsi Təbrizi və bir çox digər Azərbaycan şairlərinin əsərlərində, eləcə də miniatürlərdə tarın mövcudluğu öz əksini tapıb.
Azərbaycanda və onun hüdudlarından uzaqlarda istedadlı tarzənlar-Mirzə Sadıq, Məşədi Zeynal, Məşədi Cəmil Əmirov, Qurban Primov, Mirzə Mənsur Mənsurov, Əhməd Bakıxanov, Bəhram Mansurov, Hacı Məmmədov, Əhsən Dadaşov, Həbib Bayramov və başqalarının məşhur olduğu və bugün də istedadlı gənclərin onların yaradıcılıq ənənələrini davam etdirdikləri bildirilir.
Müəllif yazır ki, tar olmadan Azərbaycan peşəkar musiqisi indiki yüksək səviyyəsinə çata bilməzdi. Məhz buna görə də, tar Azərbaycan muğam sənətinin, xalq musiqisinin bütün dünyada məşhur olan əsas alətlərdən biridir.

Qulu Kəngərli
AZƏRTAC-ın xüsusi müxbiri
Daşkənd